Перакладчыцу Вольгу Калацкую аштрафавалі на велізарную суму

Нагадаем, жанчыну, якую раней судзілі за кухталь прапагандысту Азаронку, затрымалі падчас пратэстаў супраць вайны. 

kalackaja_0103.jpg

Перакладчыцу Вольгу Калацкую аштрафавалі на 4800 рублёў (150 базавых велічыняў), паведамляюць праваабаронцы.

Жанчыну затрымалі 27 лютага ў мінскім раёне Серабранка каля школы №134. У гэты дзень улады Беларусі ладзілі рэферэндум па Канстытуцыі, а апазіцыя заклікала выйсці на антываенную акцыю.

У Ленінскім РУУС на Калацкую склалі пратакол паводле арт. 24.3 КаАП (непадпарадкаванне міліцыянтам). 1 сакавіка суддзя Таццяна Шоцік вынесла прысуд Калацкай.

Раней вядомая перакладчыца была асуджаная на два гады «хатняй хіміі» за тое, што падчас адной з акцый пратэсту ўдарыла дзяржаўнага прапагандыста Рыгора Азаронка.