Прысуд «Tor Band»: Беларуская ўлада нічым не адрозніваецца ад самых бязлітасных рэжымаў у гісторыі чалавецтва
Вядомыя беларусы выказаліся пра жахлівы прысуд музыкам «Tor Band», якіх сукупна асудзілі амаль на чвэрць стагоддзя турмы ва ўмовах узмоцненага рэжыму за іх папулярныя песні.
Малюнак Вольгі Якубоўскай
Музыкаў гурта «Tor Band» асудзілі на вялікія тэрміны і штрафы ў памеры 3700 рублёў кожнаму. Дзмітрый Галавач атрымаў 9 гадоў узмоцненага рэжыму, Яўген Бурло — 8 гадоў узмоцненага рэжыму, Андрэй Ярэмчык — 7,5 гадоў узмоцненага рэжыму, піша «Гомель Штодзень» .
Музыкі гурта «Tor Band» Андрэй Ярэмчык, Яўген Бурло і Дзмітрый Галавач
- Лявон Вольскі, музыка, мастак і пісьменнік на сваёй афіцыйнай старонцы ў ФБ апублікаваў такі зварот:
— Музыкі «Tor Band» атрымалі жахлівыя тэрміны за песні. Менавіта за песні — за музыку і тэкст. Такога ў гісторыі Беларусі яшчэ не было. Неабходна знайсці ўсіх, хто спрычынены да гэтага прысуду. Не проста суддзю з пракурорам, а, напрыклад, чалавека-шрубку, які рабіў літаратурную экспертызу тэкстаў песень. Ці асоб, якія ініцыявалі крымінальную справу. Усіх, хто меў дачыненне да гэтага. Цётачка з дома культуры, што напісала данос, — нармальна ёй спіцца пасля таго, як яна даведалася пра 9 гадоў?
- Андрэй Шарэнда, палітык, муж палітзняволенай Паліны Шарэнды-Панасюк:
— Сёння лукашысты асудзілі да вялікіх тэрмінаў турмы хлопцаў з «Tor Band». Яўгену Бурло прызначылі восем гадоў калоніі, Дзмітрыю Галавачу — дзевяць гадоў калоніі, а Андрэю Ярэмчыку — сем з паловай гадоў калоніі. Яшчэ раней лукашысты вельмі моцна пастараліся, каб усе кліпы «Tor Band» зніклі з прастораў інтэрнэту. Але гэтыя песні і кліпы назаўсёды з намі. Пройдзе час — і мы ўсе разам спяём іх на цэнтральных плошчах нашых гарадоў, каб адзначыць нашую перамогу. А пакуль лепшай падтрымкай для хлопцаў будзе тое, што іх творчасць не знікне з нашай памяці!
- Аляксандр Чарнуха, пісьменнік і музычны журналіст:
— Сёння музыканты з беларускага гурта «Tor Band» атрымалі страшныя прысуды ў роднай краіне. Калектыў прызналі экстрэмісцкім фарміраваннем — і хлопцаў судзілі па абсалютна абсурдных прычынах. Калі вы паслухаеце песні гурта, то зразумееце гэта. Падчас абвяшчэння прысуду бубнач «Tor Band» нават не змог стаяць на мыліцах — такі дрэнны ў яго стан.
Усе вы добра ведаеце гісторыю Камбоджы і рэжыму чырвоных кхмераў. Дык вось да таго, як да ўлады прыйшоў крывавы Пол Пот, у краіне квітнеў вельмі цікавы і аўтэнтычны камбаджыйскі рок. Там былі свае суперзоркі, свая сцэна і вельмі вялікая аўдыторыя. Калі пачаліся рэпрэсіі, амаль усе гэтыя зоркі (як і іншыя дзеячы культуры) былі забіты. Куль у краіне не хапала, таму забівалі іх матыкамі. Гучыць жорстка?
Але вось маё пытанне. Што больш жорстка і крыважэрна? Забіць чалавека матыкай ці даць яму памерці ў сырой камеры ад прабадной язвы? Хутка знішчыць яго ці назіраць з усмешкай за ягонымі пакутамі?
У мяне няма адказу на гэтае пытанне. Затое ёсць усведамленне таго, што беларуская ўлада нічым не адрозніваецца ад самых бязлітасных рэжымаў у гісторыі чалавецтва. Гэта дзікуны, якія ўмеюць толькі гвалтаваць і разумеюць толькі мову гвалту. Дрымучыя, помслівыя істоты, якія баяцца нават песень. Няхай гэтыя песні працягваюць гучаць, свінцом заліваюць вушы катаў, робяць іх жыццё невыносным. Каб яны адчувалі тое самае, што і людзі, якіх яны знішчаюць.
Глядзіце таксама
- Карына Пацёмкіна, грамадская дзяячка і валанцёрка:
— Зашчаміла сэрца, калі ўбачыла прысуд музыкам «TOR BAND». Некаторыя песні гурта былі і ёсць сапраўднымі гімнамі пратэстаў. Час ад часу я іх пераслухоўваю, каб памятаць, што я «не быдла, не са статку і не баязліўка» і абавязкова «стану мацней», колькі б мяне не білі. Сіл на нянавісць да суддзяў не засталося. Ёсць толькі сілы паплакаць і ў Spotify пераслухаць іх плэйліст. Пакуль мы будзем слухаць, іх песні будуць жыць. Пакуль мы будзем памятаць, яны не памруць у забыцці за кратамі лукашэнкаўскай турмы.
«Жыве Беларусь у маім вялізным сэрцы.
Жыве Беларусь, ёй ніколі не памерці.
Жыве Беларусь, ёй жадаем лепшай долі.
Жыве Беларусь і будзе жыць, як не жыла ніколі».
Жыве «TOR BAND».
Глядзіце таксама
Рагачоўскіх музыкаў «TOR BAND», аўтараў шэрагу пратэсных хітоў Яўгена Бурло, Дзмітрыя Галавача і Андрэя Ярэмчыка затрымалі разам з блізкімі 28 кастрычніка 2022 года. Падчас знаходжання ў турме ў музыкаў значна пагоршылася здароўе. Як адзначаў «Штодзень», сілавікі завалодалі таксама акаўнтамі музыкаў, у выніку чаго былі выдалены на афіцыйным ютуб-канале кліпы з мільёнамі праглядаў. Акрамя гэтага, гітару лідара гурта канфіскавалі за «стварэнне экстрэмісцкага кантэнту». Музыкаў судзілі па некалькіх артыкулах, сярод якіх «Распальванне сацыяльнай варажнечы» і «Абраза прэзідэнта».
Глядзіце таксама
