Расійскія сектанты ўчынілі скокі пад Гомлем

«Чароўнае войска спецыяльнага прызначэння Русі» правяло баявыя скокі пад Гомлем, паведамляе канал «Флагшток».

Два дзясяткі актывістаў неапаганскай секты Расіі, якія самі сябе называюць «Чароўным войскам спецыяльнага прызначэння Русі», сабраліся, як мяркуецца, учора ў гомельскім парку на левым беразе Сожа. Мужчынская палова сектантаў аб'ядналася ў круг, каб выканаць «баявыя скокі».
За імпрэзай назіралі гомельскія сілавікі. Міліцыянты папярэдзілі прысутных аб тым, што лічаць акцыю незаконнай. Аднак у далейшым адступілі і назіралі за мерапрыемствам на адлегласці з аўтамабіля. Убаку застаўся і аўтобус з АМАПам.
Ідэалогія гэтай секты прадстаўляе сумесь ідэй славянафільства і расійскага паганства. Яе паслядоўнікі спрабуюць аднавіць СССР і вераць у разнастайныя тэорыі змоваў.
Чаму расійскія сектанты абралі для свайго мерапрыемства менавіта Гомель, застаецца загадкай.