«Рэпарцёры без межаў» патрабуюць неадкладна вызваліць Пратасевіча
Праваабаронцы рэзка асудзілі практыку скланення журналістаў да дачы прызнальных паказанняў пад ціскам і запатрабавалі даць Пратасевічу і Сапега магчымасць вярнуцца ў Літву.
Міжнародная арганізацыя «Рэпарцёры без межаў» (RSF) заклікае беларускія ўлады неадкладна вызваліць з-пад хатняга арышту журналіста Рамана Пратасевіча і даць яму і яго дзяўчыне Соф'і Сапега магчымасць вольна перасоўвацца. З такім патрабаваннем праваабаронцы выступілі ў суботу, 26 чэрвеня.
Напярэдадні, 25 чэрвеня, у міжнародных СМІ з'явілася інфармацыя аб тым, што былы галоўны рэдактар апазіцыйнага Telegram-канала NEXTA Раман Пратасевіч і яго дзяўчына, расіянка Соф'я Сапега, затрыманыя ў Мінску 23 траўня пасля прымусовай пасадкі там пасажырскага самалёта авіякампаніі Ryanair, былі пераведзены з СІЗА пад хатні арышт.
Улады Беларусі вінавацяць Рамана Пратасевіча па трох артыкулах Крымінальнага кодэкса краіны: 130 (распальванне сацыяльнай варожасці), 293 (арганізацыя масавых беспарадкаў) і 342 (арганізацыя дзеянняў, што груба парушаюць грамадзкі парадак). Соф'я Сапега праходзіць падазраванай па двух артыкулах КК Беларусі: 130 (распальванне сацыяльнай варожасці) і 342 (удзел у масавых беспарадках).
«Зневажальная практыка прымусовых прызнанняў»
У апублікаванай заяве арганізацыя «Рэпарцёры без межаў» звяртаецца не толькі да беларускіх, але і да расійскіх уладаў, заклікаючы іх адмовіцца ад практыкі прымусу журналістаў да дачы якіх-небудзь прызнальных паказанняў. «Нас вельмі непакоіць, што на Рамана Пратасевіча працягваюць аказваць сур'ёзны ціск, і мы асцерагаемся за яго псіхічнае і фізічнае здароўе», — падкрэслівае ў сувязі з гэтым кіраўнік аддзялення «Рэпарцёраў без межаў у Германіі» Крысціян Мір. З пункту гледжання праваабаронцы, Пратасевічу і Сапега трэба неадкладна даць магчымасць пакінуць Беларусь і вярнуцца ў Літву, «якая з'яўлялася канчатковай мэтай іх паездкі і краінай, дзе яны жылі да згону (самалёта. - Рэд.)».
У RSF нагадваюць, што падчас «прызнання» Пратасевіча ў нібыта здзейсненых ім злачынствах, паказанага на беларускім дзяржаўным тэлеканале АНТ праз дзесяць дзён пасля затрымання актывіста, на вачах у журналіста былі слёзы, а на яго запясцях — сляды ад кайданкоў. «Такія прыкметы душэўнага і фізічнага знясілення з'яўляюцца тыповымі для прызнанняў, зробленых пад ціскам, і для пастановачных сцэн дзяржаўнага тэлебачання», — канстатуюць у арганізацыі.
dw.com