Сябры Руху «За Свабоду» вывесілі на трасе расцяжкі супраць «Начных ваўкоў»
«Мы сваю зямлю нікому не аддамо!» пад такім дэвізам актывісты Руху «За Свабоду» сёння днём вывесілі транспаранты супраць праезду па Беларусі «Начных ваўкоў».
«Акцыя прайшла ў прамежку часу з 13:00-13:30 на трасе М1 („Алімпійка“) на мастах транспартных развязак ля вёскі Каўпеніца, баранавіцкага мікрараёна „Паўночны“ і пасёлка Зорны», — распавялі арганізатары акцыі.
Па іх словах, яны вывесілі расцяжкі «супраць праезду па тэрыторыі Беларусі пуцінскіх «Начных ваўкоў»: «Нет фашизму! И российскому тоже. Путинцы, убирайтесь домой», «Беларусь не Расея». «Мы свою землю никому не отдадим».
«Расцяжкі правіселі трохі больш за гадзіну. Грузапаток на трасе быў ажыўлены, машыны, якія праязджалі міма, віталі транспарант сігналамі. У гэты час шмат ехала і аўтамабіляў з расейскімі нумарамі», — адзначылі сябры Руху.
Па словах арганізатараў акцыі, «два з трох транспарантаў былі выкананыя па-расейску свядома, бо асноўны пасыл быў для расейцаў».
«Акцыю лічым удалай. Свядома не прывязваліся да часу праезду „ваўкоў“ таму, што не ведалі дакладнага часу, а завязвацца на ўвесь дзень не выпадала. Галоўным лічым тое, што мінакі гэта ўбачылі. Наш галоўны пасыл — ёсць людзі, якія будуць бараніць сваю зямлю ад усялякай брыдоты», — заключылі сябры Руху «За Свабоду».
Паводле pyx.by