Стала вядома, за што Мінінфарм заблакаваў буйны недзяржаўны партал

Сайт інтэрнэт-рэсурсу Blizko.by перастаў адкрывацца 21 верасня — ён быў недасяжны ні ў Беларусі, ні за мяжой. Цяпер стала вядомая прычына закрыцца буйнога партала.

Blizko.by быў адным з найбуйнейшых недзяржаўных інтэрнэт-рэсурсаў, пісаў пра Мінск, Беларусь, публікаваў і сусветныя навіны, у тым ліку і пра вайну ва Украіне. Паводле Similarweb.com, у жніўні партал наведалі 4,8 мільёна чытачоў.

21 верасня пры спробе зайсці на партал можна было пабачыць надпіс пра тое, што «доступ да рэсурсу абмежаваны ў мэтах выканання рашэння Міністэрства інфармацыі Рэспублікі Беларусь, прынятага на падставе Закона Рэспублікі Беларусь “Аб сродках масавай інфармацыі”».

Цяпер стала вядома, за што Мінінфарм заблакаваў партал.

Тэлеграм-канал «Позірк» паведаміў, што партал blizko.by быў заблакаваны з-за згадкі блогера Антона Матолькі, якога ўлады ўнеслі ў «спіс тэрарыстаў». Гэта навіна была на партале з 2021 года.