Суддзя адпраўляе затрыманых учора на суткі і зычыць ім удачы

У судзе Партызанскага раёна разглядзелі справы чатырох мінчукоў, якіх абвінавацілі ў «непадпарадкаванні супрацоўнікам міліцыі» па арт. 24.3 КаАП. Ва ўсіх арыштаваных ёсць непаўнагадовыя дзеці.
Фота Дзмітрыя Дзмітрыева

Фота Дзмітрыя Дзмітрыева

Лекару Дзмітрыю Маркелаву суддзя Міхаіл Макарэвіч прызначыў 14 сутак арышту. На судзе мужчына распавёў, што яны з жонкай ішлі ў бок вуліцы Якуба Коласа, калі да іх пад’ехалі аўтобусы з амапаўцамі. Сілавікі папрасілі паказаць дакументы для высвятлення асобы. Пасля чаго камусьці патэлефанавалі і вырашылі ўсіх затрымаць.

«14 арышту. Улічваючы, што ў вас малое дзіця. Усё, поспехаў вам», — закончыў суддзя Макарэвіч.

Супрацоўніка Мінскага трактарнага завода Сцяпана Казанава затрымалі на выбарчым участку за тое, што ён нібыта сапсаваў бюлетэнь. Але пратакол у РУУСе склалі за «адмову прайсці ва ўпраўленне і спробу ўцячы». Па словах хлопца, да яго ў кабінку зайшоў міліцыянт і прапанаваў прайсці з ім. Суддзя арыштаваў хлопца на 12 сутак.

«Усё, можаце быць вольныя, поспехаў вам, да пабачэння», — зноў суддзя падбадзёрыў затрыманага.

33-гадовы Сяргей Шэпелеў на судзе растлумачыў, што абставіны затрымання ён не памятае і цалкам прызнае віну. Сведка-міліцыянт на судзе сцвярджаў, што асабіста бачыў каля РУУСа, як Сяргей аказваў непадпарадкаванне, крычаў і спрабаваў уцячы. У выніку, яго пакаралі 13-сутачным арыштам.

Суддзя Макарэвіч звярнуўся і да Шэпелева: «Усё, поспехаў вам, да пабачэння».

36-гадовага Ягора Харламава затрымалі ўчора на выбарчым участку №33 па «падазрэнні ў пашкоджанні бюлетэня». Але ў Партызанскім РУУСе склалі пратакол за непадпарадкаванне міліцыянтам, як і ў астатніх затрыманых. Вынік — 13 сутак арышту.

І «фірмовая» фраза ў канцы ад суддзі: «Усё, можаце быць вольныя, поспехаў вам, да пабачэння».

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: