Тры гады «хіміі», бо стаяў у счэпцы
Андрэй Зянькоў, як вынікае з абвінавачання «маючы пры сабе бел-чырвоны-белы сцяг, які выкарыстоўваўся як пратэсны сімвал, публічна выкрыкваў розныя лозунгі». На судзе асноўным доказам віны стаў здымак, дзе пратэстоўцы стаяць у счэпцы.
Андрэй Зянькоў у цёмных шортах і шэрай байцы
У судзе Ленінскага раёна Мінска 20 студзеня мінчука асудзілі за ўдзел у "Маршы герояў" 13 верасня 2020 года паводле ч. 1 арт. 342 Крымінальнага кодэкса — удзел у дзеяннях, якія груба парушаюць грамадскі парадак. Суддзя Анастасія Ачалава прызначыла Андрэя Зянькову тры гады "хіміі", паведамляюць праваабаронцы.
Андрэя Зянькова ідэнтыфікавалі па фота і відэа, дзе ён стаяў у счэпцы побач з гасцініцай "Рэнесанс" на праспекце Дзяржынскага, а таксама па знойдзеным падчас ператрусу адзенні. Да суда хлопец утрымліваўся пад вартай, а пасля абвяшчэння прысуду яго вызвалілі ў зале суда да накіравання ў папраўчую ўстанову адкрытага тыпу.
Паводле версіі абвінавачвання, Андрэй Зянькоў 13 верасня 2020 года роўна адну гадзіну "дзеля выканання публічных заклікаў да актыўнага ўдзелу ў групавых дзеяннях, якія груба парушаюць грамадскі парадак, размешчаных у глабальнай камп'ютарнай сетцы Інтэрнэт на розных інтэрнэт-рэсурсах, з'яўляючыся дакладна праінфармаваным з розных крыніц пра планаванае правядзенне на тэрыторыі Мінска масавых мерапрыемстваў без падачы заяваў аб іх правядзенні ў мясцовы выканаўчы і распарадчы орган і без атрымання рашэння гэтага органа аб дазволе правядзення дадзеных масавых мерапрыемстваў, арганізатары і ўдзельнікі якіх абавязаныя выконваць грамадскі парадак і выконваць усе законныя патрабаванні супрацоўнікаў ОУС, з мэтай публічнага выказвання незаконнымі спосабамі сваіх грамадска-палітычных поглядаў і пратэсту, вядзення дэструктыўнай дзейнасці, накіраванай, у тым ліку, на абвастрэнне напружанасці ў грамадстве, узяў актыўны ўдзел у групавых дзеяннях, што груба парушаюць грамадскі парадак і спалучаныя з відавочным непадпарадкаваннем законным патрабаванням супрацоўнікаў ОУС, далучыўшыся да групы грамадзян, якія ўдзельнічалі ў паказаных супрацьпраўных дзеяннях, што груба парушаюць грамадскі парадак, выяўленых у сумесным парушэнні Закона аб масавых мерапрыемствах, грамадскіх асноваў, добрапрыстойнасці і ўнутранага спакою, спалучаных з відавочным непадпарадкаваннем патрабаванням спыніць названыя групавыя дзеянні".
Паводле абвінавачвання, Зянькоў "публічна выкрыкваў розныя лозунгі, законныя патрабаванні супрацоўнікаў ОУС пакінуць месца несанкцыянаванага масавага мерапрыемства і разысціся не выканаў, працягнуўшы знаходзіцца ў паказаным месцы, а затым, пры набліжэнні супрацоўнікаў міліцыі, сумесна з іншымі нявысветленымі грамадзянамі стаў у "счэпку локцямі", гэта значыць групавое скрыжаванне рук у локцевых суставах з мэтай перашкаджэння затрыманню супрацоўнікамі ОУС, гэта значыць аказаў відавочнае непадпарадкаванне прадстаўнікам ўлады".
Акрамя гэтага, Зянькоў, маючы пры сабе бел-чырвоны-белы сцяг, які выкарыстоўваўся як пратэсны сімвал, публічна выкрыкваў розныя лозунгі. Мужчыну затрымалі супрацоўнікі Заводскага РУУС Мінска.
На судзе абвінавачаны прызнаў віну цалкам. Ён расказаў, што быў нязгодны з вынікамі прэзідэнцкіх выбараў, таму выйшаў на акцыю пратэсту. У счэпку ён устаў каля гасцініцы "Рэнесанс" на праспекце Дзяржынскага. Там яго і затрымалі.
На судзе асноўным доказам віны стаў здымак T*T.BY, дзе пратэстоўцы стаяць у счэпцы. Сярод іх — Андрэй Зянькоў. Гэтае фота было апублікавана некаторымі тэлеграм-каналамі. На ім абвінавачаны пазнаў сябе. Таксама доказам віны Зянькова выступала відэа "счэпкі" з N*xta і звесткі білінгу мабільнага тэлефона, які вызначыў Зянькова ў месцы акцыі. Абвінавачанага ідэнтыфікавалі і па адзенні, у якім ён быў на Маршы і якое сілавікі знайшлі ў яго падчас ператрусу.
У выніку суддзя Анастасія Ачалава асудзіла Андрэя да трох гадоў абмежавання волі з накіраваннем ва ўстанову закрытага тыпу ("хіміі"). Чырвоныя красоўкі з белымі палоскамі Adidas, чорныя шорты, шэрую байку з доўгім рукавом Nike, якія выступалі рэчыўнымі доказамі па справе (у іх Андрэй быў на Маршы), вярнулі Зянькову.