У Калінкавічах дэфектолага дзіцячага садка аштрафавалі за падпіску на «экстрэмісцкі» тэлеканал

Дэфектолага дзіцячага сада ў Калінкавічах Вікторыю Яшчанку аштрафавалі за падпіску ў сацсетках на тэлеканал «Б**сат». Яго беларускія ўлады аб'явілі «экстрэмісцкім фарміраваннем».

Пратакол склалі па рапарце маёра крымінальнага вышуку, паведамляе «Палеская вясна». У дакуменце гаворыцца: «Яшчанка, якая неаднаразова брала ўдзел у несанкцыянаваных масавых мерапрыемствах у жніўні 2020-га, на сваёй старонцы ў сацыяльнай сетцы Instagram утрымлівае падпіску на групу тэлеканала «Б**сат».

Дзяўчыну прызналі вінаватай за «захоўванне інфармацыйнай прадукцыі, якая змяшчае заклікі да экстрэмісцкай дзейнасці». Яе аштрафавалі на 580 рублёў з канфіскацыяй тэлефона, які палічылі «сродкам здзяйснення правапарушэння».

Паводле «Еўрарадыё».