У Лепельскім раёне затрымалі ўладальніка аграсядзібы «Поўсвіж» Васіля Шкіндэра
Сілавікі Лепельскага раёна затрымалі музыку, культурнага дзеяча і грамадскага актывіста Васіля Шкіндэра, уладальніка аграсядзібы «Поўсвіж», размешчанай у вёсцы Вялікі Поўсвіж недалёка ад райцэнтра, паведамляе «Віцебская вясна».
Фота sb.by
Паводле інфармацыі праваабаронцаў, Шкіндэра затрымалі яшчэ
13 чэрвеня, 14-га суддзя Лепельскага раённага суда Наталля Сушко арыштавала яго
на 15 сутак. На якой падставе і паводле якога артыкула, невядома.
Раней у мужчыны праводзілі ператрус, але нічога забароненага
не знайшлі.
Васіль Шкіндэр вядомы далёка за межамі свайго раёна як
энтузіяст беларускай традыцыйнай культуры, збіральнік фальклору. У сваёй
сядзібе ён стварыў музей гісторыі і сельскага побыту, праводзіць народныя абрады. Таксама Васіль вядомы сваёй ігрой на дудзе, якую сам узнавіў па адзіным
на Лепельшчыне экзэмпляры гэтага інструмента, які захоўваецца ў краязнаўчым
музеі.
У сваёй сядзібе Шкіндэр не толькі прымае гасцей, але і
праводзіць культурныя мерапрыемствы — пленэры, майстар-класы рамеснікаў,
выставы. Штогод ён праводзіў дазволены ўладамі фестываль «Жнівень», куды
з'язджаліся мастакі, рамеснікі, музыкі.
У 2017 годзе аграсядзіба «Поўсвіж» стала лепшай на
рэспубліканскім конкурсе ў намінацыі «Захавальнік традыцый». Пра Васіля
Шкіндэра неаднаразова пісалі дзяржаўныя СМІ.
«Люстэрка» нагадвае, што на гэтым тыдні ў Пружанскім раёне затрымалі
ўладальніцу аграсядзібы «Стулы» Ларысу Быцко, якая таксама займалася папулярызацыяй
беларускай традыцыйнай культуры. Яе арыштавалі на 15 сутак. Падчас налёту
сілавікоў на сядзібу былі затрыманыя і іншыя людзі.
Тым часам у іншым горадзе Віцебшчыны працягваюцца рэпрэсіі супраць педагогаў. З Полацкага
дзяржуніверсітэта звольненыя не менш за сем супрацоўнікаў. Пра гэта паведамляе «Позірк».
Паводле інфармацыі крыніцы, рэктар ПДУ Юрый Раманоўскі падпісаў загады пра звальненне сакратара дэканата гісторыка-філалагічнага факультэта Кацярыны Шаўлюга, выкладчыка кафедры сусветнай літаратуры і замежных моў Анастасіі Мазго, старшага выкладчыка кафедры замежных моў Святланы Панімашчанка, сакратара кафедры фізічнага выхавання і спорту Таццяны Чаркасавай.
«Адразу за
Чаркасавай заяву на звальненне падала спецыяліст па суправаджэнні навучальнага
працэсу кафедры фізічнай культуры і спорту Святлана Ніколіна», — сцвярджае крыніца.
Раней паведамлялася,
што звольненыя дацэнты Віктар Чараўко і
Сяргей Глазырын. Яны абодва адбылі «суткі» за «распаўсюд
экстрэмізму». Таксама звольнены дацэнт Юрый Кежа (праз данаты фондам).
Паводле слоў суразмоўцы, калі затрыманні і звальненні
працягнуцца, «універсітэт можна будзе закрываць».