У Літве па падазрэнні ў шпіянажы затрымалі юрыста, які перадаваў у Мінск дадзеныя беларускіх палітэмігрантаў

Праваахоўныя органы Літвы затрымалі падазраванага ў шпіянажы грамадзяніна Літвы Мантаса Данелюса. Яго ўзялі пад варту на два месяцы, паведамляе са спасылкай на паліцыю Вільні выданне BNS.

«Мы можам пацвердзіць, што гэты чалавек затрыманы, ён падазраецца ў шпіянажы», — сказаў у аўторак прадстаўнік паліцыі Рамунас Матоніс.

Паводле яго слоў, суд пастанавіў заключыць падазраванага пад варту на два месяцы.

Па словах Матоніса, дасудовае расследаванне, пачатае ў супрацоўніцтве з Дэпартаментам дзяржаўнай бяспекі, праводзіцца супрацоўнікамі Бюро крымінальнай паліцыі Літвы і ўзначальваецца пракуратурай Віленскага раёна.

«Каб не нашкодзіць расследаванню, мы пакуль не можам каментаваць гэта расследаванне», — сказаў ён.

Раней медыя паведамлялі, што праваахоўныя органы мяркуюць, быццам Данелюс укараніўся ў беларускія арганізацыі ў Літве і перадаў інфармацыю пра іх беларускім спецслужбам. У прыватнасці, ён зліваў дадзеныя пра актывістаў прапагандыстцы з БТ Ксеніі Лебедзевай, якую называў «супрацоўніцай КДБ».

Данелюс прадстаўляўся бізнес-кансультантам, чытаў лекцыі і прапаноўваў беларусам юрыдычную дапамогу. Таксама ён нібыта дапамагаў арганізацыям «Наш дом», «Дапамога».

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: