У міліцыі адказалі на заяву Алены Леўчанка пра ўмовы на Акрэсціна

У ГУУС Мінгарвыканкама пракаментавалі заяву баскетбалісткі Алены Леўчанка, якая выйшла на волю пасля 15 сутак на Акрэсціна, пра тое, што ўмовы ўтрымання ў ЦІП можна назваць здзекам.

— Паведамляем, што на самой справе спартсменка перабольшвае сітуацыю з нагоды ўтрымання на Акрэсціна. Для ўсіх затрыманых прадугледжана трохразовае харчаванне, вада, туалет, пасцельныя прыналежнасці, туалетная папера, мыла. Некаторыя журналісты былі там (у ізалятары на Акрэсціна. - заўв. Рэд.), І ніхто не скардзіўся, — заявіў «Комсомольской правде в Беларусі» афіцыйны прадстаўнік ГУУС Мінгарвыканкама Раман Лашкевіч. Магчыма, гаворка ідзе пра сітуацыю, калі журналістаў TUT.BY, «Комсомольской правды в Беларусі» і БелаПАН затрымалі для праверкі дакументаў падчас асвятлення акцый пратэсту, пазней у РУУС на іх склалі пратаколы нібыта за ўдзел у несанкцыянаваным шэсці, а суд прызнаў іх вінаватымі і даў «суткі», якія яны правялі на Акрэсціна.
Па словах Лашкевіча, умовы ўтрымання аднолькавыя для ўсіх затрыманых: «Хутчэй за ўсё, спартсменка была на эмоцыях і магла гэта сказаць, бо для яе гэтыя ўмовы сапраўды з'яўляюцца нязвыклымі. Праверкі там ажыццяўляюцца рэгулярна: іх мэтай з'яўляецца ў тым ліку вывучэнне ўмоў утрымання дастаўленых у спецыяльныя ўстановы міліцыі затрыманых».
15 кастрычніка вядомая баскетбалістка Алена Леўчанка выйшла на волю пасля 15 сутак адміністрацыйнага арышту. Яе асудзілі за ўдзел у маршы 23 жніўня.
— У судзе я ўжо расказала, у якіх умовах даводзілася адбываць гэты тэрмін. Вядома, для мяне гэта быў шок. Трэба ўсё гэта яшчэ пераварыць. Проста не магу зразумець, чаму стаўленне такое да людзей. Калі 13 сутак спіш проста на халодных бэльках, калі ў камэру на чатырох чалавек падкідваюць пятага, і хтосьці спіць на падлозе. Пры гэтым на ІЧУ, дзе прабыла першыя суткі, было цалкам нармальнае стаўленне. А на ЦІП не пускалі памыцца, даводзілася спаць на бэльках, не працавала каналізацыя. І ўсё гэта адзін пакой, даўжыня якога сем метраў, а шырыня ... (паказвае каля трох метраў). Навошта так ставіцца да людзей? Гэта ж проста здзек! — сказала Леўчанка ў інтэрв'ю.
tut.by