У Мінску судзяць грамадзяніна Латвіі, бо «не спадабаліся паведамленні, якія асуджаюць рэжым Лукашэнкі»

У Мінскім гарадскім судзе 15 снежня працягваецца разгляд крымінальнай справы грамадзяніна Латвіі Дзмітрыйса Міхайлоўса. Яго абвінавачваюць паводле шэрагу пратэсных артыкулаў, паведамляюць праваабаронцы.

Судовы працэс пачаўся 14 снежня, яго вядзе суддзя Святлана Чарапанава.

44-гадовага грамадзяніна Латвіі, які быў часова зарэгістраваны ў Мінскай вобласці, абвінавачваюць у закліках да мер абмежавальнага характару, скіраваных на прычыненне шкоды нацыянальнай бяспецы Беларусі (ч. 3 арт. 361), распальванні іншай сацыяльнай варожасці (ч.2 арт. 130), абразе прадстаўніка ўлады (арт. 369) і абразе прэзідэнта (ч. 1 і ч.2 арт. 368).

Дзмітрыйса Міхайлоўса затрымалі 1 сакавіка 2022 года і да суда змясцілі ў СІЗА №1 у Мінску.

Вядома таксама, што ў кастрычніку Дзмітрыйс Міхайлоўс быў уключаны ў «Спіс асоб, дачычных да тэрарыстычнай дзейнасці».

Там было пазначана, што Міхайлоўс праходзіць абвінавачаным па двух артыкулах Крымінальнага кодэкса Беларусі. Таксама было ўказана, што грамадзянін Латвіі быў часова зарэгістраваны ў Мінскай вобласці.

«Цяпер затрыманы адзін грамадзянін Латвіі. Яго тэлефон праверылі, і ўладам не спадабаліся паведамленні, якія асуджаюць рэжым Лукашэнкі. Яго змясцілі пад варту, — паведаміла парламенцкая сакратарка МЗС Латвіі Занда Калніня-Лукашэвіча. — Калі супрацоўнікі консульства хутка прыбылі на сустрэчу з затрыманым, то яго ўжо не заспелі, паколькі яго на месяц змясцілі ў закрытую псіхіятрычную бальніцу для правядзення экспертыз».