У Навагрудку жанчына атрымала 10 сутак за пікет, бо на вопратцы была зорка з лічбамі 23.34

Жыхарку Навагрудка Жанну Баброўскую асудзілі за ўдзел у экскурсіі, падчас якой на вопратцы была прышпіленая зорка. Адміністрацыйную справу разгледзелі ў судзе Навагрудзкага раёну 8 лютага, распавядае «Свабода».

09bf5c60_6e6a_42ba_a5c9_c69824aa4bde_w650_r0_s.webp

Як расказала Жанна Баброўская, яна прыйшла 24 студзеня на экскурсію, прысвечаную дню памяці Халакосту, як ўдзельніца, не гід. Усім удзельнікам, якія аплацілі экскурсію, прышпілілі зоркі з надпісам «23.34». Усяго было больш за 20 чалавек. Падчас экскурсіі ўдзельнікаў традыцыйна суправаджалі міліцыянты. Тады Жанну не затрымлівалі.

«Камбінацыя лічбаў у нас нібыта яшчэ не забароненая. Яна можа асацыявацца з чым заўгодна. Гэта тэлефонны код Жлобіна, у некага гэта касавы чэк, у некага — артыкул Адміністрацыйнага кодэксу», — каментуе лічбы на зорках жанчына.

Яна сама прыйшла ў міліцыю 27 студзеня па іншай справе. 1 студзеня яна выйшла пагуляць на гарадзкую плошчу пасля самаізаляцыі па каранавірусе. Міліцыянт, які ведаў, што яна хварэла, сказаў гучна, так, што чулі іншыя: «Гэта тая, у якой страшны COVID». Баброўская напісала заяву на супрацоўніка міліцыі за тое, што незаконна распаўсюдзіў звесткі пра яе стан здароўя. Калі яна прыйшла ў міліцыю па позве наконт гэтага выпадку, на яе склалі пратакол за ўдзел у недазволеным масавым мерапрыемстве падчас экскурсіі.

«Як гэта зразумець? Усе былі на экскурсіі, адна я была на пікеце?.. Калі гэта было парушэнне, то куды ж вы глядзелі цягам дзьвюх гадзін? Чаму вы не зрабілі заўвагу? Чаму не запыталіся, што яны значаць, а працягвалі ўдзельнічаць у маім «пікеце»?» — задае рытарычнае пытанне міліцыянтам Баброўская.

Раней Баброўская адседзела 5 дзён за тое, што стаяла з плакатам супраць гвалту ў Дзень маці. У суд над ёй тады нікога не пусцілі праз эпідэмію каронавірусу. Пасля вызвалення яе вывезлі з РАУС, пад сценамі якога чакалі сваякі, і высадзілі за мястэчкам.

Сям’я Баброўскіх займаецца праектам па ўшанаваньні 10 навагрудзкіх семʼяў, якія ў апошнюю вайну хавалі ў сябе габрэяў. Гэты праект пачалі абмяркоўваць, калі яшчэ быў жывы бізнэсовец і мецэнат Сяргей Коваль, стваральнік сядзібы ў Літоўцы.

Гэтая публікацыя падрыхтаваная з выкарыстаньнем інфармацыі БелаПАН.