У офіс будаўнічай гандлёвай сеткі ОМА прыйшлі сілавікі. Праходзіць ператрус

У офісе гандлёвай сеткі ОМА праходзіць ператрус. Пад будынкам стаяць чорныя бусы, паведамляе найбуйнейшы беларускі інфармацыйны партал (прызнаны «экстрэмісцкім»).

Раней буйны акцыянер сеткі прыпыніў дзейнасць у Беларусі, кампанія перастала закупляць беларускія і расійскія тавары з-за нападу Расіі на Украіну.

Пра ператрус ў галаўным офісе ананімна паведамілі два супрацоўнікі кампаніі. Работнік адной з крам сеткі распавёў, што характэрныя для сілавікоў машыны ля будынка заўважыў кур'ер.

— Кажа, на галаўным офісе стаіць шмат чорных бусаў. У іх ужо нікога не было, сілавікі ўжо ў офісе, як мы зразумелі. У краме ўсё спакойна, працуем, як звычайна. Ніхто нічога не кажа, калі б не кур'ер, які прыехаў і нам пра гэта сказаў, то наогул цішыня. Ніхто б нічога і не ведаў. Мабыць, яшчэ адна кампанія трапіла ў няласку, — напісаў малады чалавек.

Па словах другога супрацоўніка ОМА, яго калегі, якія ў гэты час павінны знаходзіцца ў будынку, не выходзяць на сувязь. Адказваюць толькі тыя, хто дома. Ён таксама кажа, што бачыў мікрааўтобусы. Заўважыў, што яны былі без дзяржнумароў.

— Мінімум тры, — удакладняе ён. — На паркоўцы — супрацоўнікі ў экіпіроўцы. У аднаго я бачыў вялікімі літарамі на плячы надпіс «КДБ». У нас васьміпавярховы будынак, арандаваны, але цалкам заняты ОМА. Унутры можа быць шмат чалавек.

У кантакт-цэнтры OMA пакуль не ведаюць, што адбываецца ў галаўным офісе.

— Магчыма, але нам не даюць такую інфармацыю. Мы знаходзімся выдалена, — адказалі па тэлефоне.

Нагадаем, у сярэдзіне траўня стала вядома, што фінска-літоўская кампанія «Kesko Senukai» прыпыніла дзейнасць у Беларусі і выходзіць са складу акцыянераў гандлёвай сеткі ОМА. Планавалася, што продаж долі завершаць у бліжэйшы час, аднак канкрэтныя тэрміны не паведамляліся. Усе гандлёвыя адносіны з беларускай сеткай былі спыненыя яшчэ ў красавіку. Акрамя таго кампанія прыпыніла закупкі расійскіх і беларускіх тавараў. Прычына такога рашэння — расійскае ўварванне ва Украіну.