Украінскія айцішнікі знайшлі, як сачыць за актывамі беларускіх алігархаў

Украінская кампанія YouControl запусціла праект RuAssets, каб дапамагчы выводзіць на чыстую ваду кампаніі і асоб, якія падтрымліваюць вайну Расіі з Украінай. Беларускіх бізнесоўцаў гэта таксама тычыцца, піша Insider.

«Платформа паказвае, ці належаць кампаніі расійскім або беларускім грамадскім дзеячам. Мэта палягае ў тым, каб замарозіць іх рахункі і арыштаваць іх маёмасць: яхты, самалёты, вілы і многае іншае», — тлумачыць заснавальнік і выканаўчы дырэктар YouControl Сяргей Мільман.

З дапамогай гэтага інструмента можна ўбачыць, ці звязаны бізнес з людзьмі, якія трапілі пад санкцыі, або з асобнымі прапагандыстамі.

You Control была заснавана ў 2014 годзе, кампанія займаецца зборам адкрытых даных з больш чым 180 агульнадаступных крыніц. Платформа Ru Assets выкарыстоўвае даныя дзяржрэестра і іншую агульнадаступную інфармацыю.

Паводле «Еўрарадыё».