Выдаўцу Андрэю Янушкевічу, якога затрымалі пасля ператрусу ў кнігарні «Кнігаўка», далі 10 сутак

Андрэя Янушкевіча і супрацоўніцу крамы Насту Карнацкую затрымалі ў панядзелак пасля ператрусу ў «Кнігаўцы».

Паводле інфармацыі найстарэйшага беларускага выдання (прызнанае «экстрэмісцкім»), выдавец Андрэй Янушкевіч атрымаў 10 сутак адміністрацыйнага арышту.

Сілавікі прыйшлі з ператрусам кнігарню «Кнігаўка» ў дзень яе адкрыцця. Былі затрыманыя Андрэй Янушкевіч і супрацоўніца кнігарні Наста Карнацкая. Таксама былі канфіскаваныя 200 кніг.

Па 15 выданнях будзе «праведзеная экспертыза», паведаміла супрацоўніца выдання «СБ.Беларусь Сегодня» Людміла Гладкая.

Паводле Гладкай, выдавец вёў перапіску з офісам Святланы Ціханоўскай, а супрацоўнікі выдавецтва «мелі дачыненне да рэдагавання некаторых дэструктыўных тэлеграм-каналаў».