Забралі 200 кніг, нібыта выявілі перапіску са штабам Ціханоўскай. Падрабязнасці затрыманняў у «Кнігаўцы»

Учора пасля ператрусу ў кнігарні «Кнігаўка» былі затрыманыя дырэктар Андрэй Янушкевіч і супрацоўніца крамы Наста Карнацкая.

Сілавікі затрымалі выдаўца Андрэя Янушкевіча і забралі ў яго 200 кніг, паведамляюць праваабаронцы са спасылкай на праўладныя каналы. Па 15 з іх будзе «праведзена экспертыза», якая менавіта — невядома.

Паводле праўладных тэлеграм-каналаў, Янушкевіч нібыта вёў перапіску з офісам Святланы Ціханоўскай, а супрацоўнікі выдавецтва «мелі дачыненне да рэдагавання некаторых дэструктыўных тэлеграм-каналаў».

Нагадаем, учора ў Мінску адкрылася кнігарня «Кнігаўка». На адкрыццё прыйшлі прапагандысты, якіх абурыла тое, што там прадаюцца гістарычныя кнігі на беларускай мове. Пазней у кнігарню прыйшлі з ператрусам сілавікі.