Выезду з Беларусі чакаюць больш за пяць тысяч грузавікоў. Гэта новы рэкорд

Дзяржаўны памежны камітэт Беларусі заявіў, што толькі тры з дзевяці еўрапейскіх пунктаў пропуску выконваюць дамоўленасці па афармленьні вялікагрузаў.

Ад пачатку снежня чэргі з фураў на мяжы павялічыліся яшчэ на 20%, адзначаюць у памежным ведамстве.

Самым загружаным застаецца літоўскі кірунак, дзе агулам назбіралася амаль 2200 фур. У чарзе на польскіх пераходах з беларускага боку стаяць 1720 машын, на латышскіх — 1090. Разгружаны толькі ўкраінскі напрамак, тут не болей за паўсотні грузавых аўтамабіляў.

Паводле кіроўцаў, у чэргах даводзіцца стаяць па пяць сутак і нават больш. Пры гэтым на мяжы адсутнічаюць элементарныя бытавыя ўмовы: мыюцца на вуліцы, ходзяць у прыбіральню «пад кола».

Не дапамагаюць і спецыяльныя пропускі на перавоз хуткапсавальных тавараў — за такі гадавы дазвол кампаніі плацяць некалькі тысяч долараў. Бо калі ў адгароджаным калідоры з двухбаковым рухам стаіць глухая чарга, немагчыма аб’ехаць пярэднія машыны нават фізічна.

Польшча закрыла пераход Брузгі — Кузніца пасля таго, як туды накіравалася вялікая група мігрантаў. У выніку на суседнім пераходзе Бераставіца — Баброўнікі сабраліся сотні фураў з таварамі для Расіі.
Паводле «Свабоды».