Да 14 студзеня. Літва падоўжыла надзвычайнае становішча на мяжы з Беларуссю

У аўторак Сейм Літвы ўхваліў рашэнне падоўжаць рэжым надзвычайнага становішча яшчэ на месяц. МУС краіны настойвае, што мігранцкі крызіс не скончыўся.

Урад Літвы ўнёс у Сейм прапанову аб працягненні надзвычайнага становішча за 10 км ад мяжы і ў лагерах мігрантаў да 14 студзеня 2022 году, інфармуе агенцтва BNS.

Сейм 7 снежня ўхваліў такое рашэнне. Паводле спікера Сейма Вікторыі Чмілітэ-Нільсэн, якая прадстаўляла гэтае пытанне, пагрозы, якія прымаліся для абароны грамадзкіх інтарэсаў, забеспячэння бяспекі дзяржавы, па-ранейшаму застаюцца.

Згодна з прынятай пастановай, надзвычайнае становішча на мяжы з Беларуссю ўведзена праз рост напружанасці ў сувязі з нелегальнай міграцыяй. У Міністэрстве ўнутраных спраў, якое распрацоўвала рашэнне, заявілі, што мэта — «не дапусціць магчымых правакацый на памежных пунктах пропуску».

Сёлета ў Літву ўехалі больш за 4,2 тысячы чалавек. У верасні краіна перастала прымаць іх у лагеры мігрантаў, дзе ўспыхвалі бунты, і пачала адпраўляць назад у Беларусь. Вільня вінаваціць рэжым Лукашэнкі ў арганізацыі патокаў мігрантаў і называе гэта гібрыднай агрэсіяй. Такой жа думкі прытрымліваюцца Польшча, Эстонія, Латвія, Нямеччына і некалькі іншых краін, уключна з ЗША.
Паводле «Свабода».