Выйшла на волю палітзняволеная Ларыса Танкашкур. Гэта паштарка, якая распаўсюдзіла звесткі аб сілавіках

Жанчыне прысудзілі тры месяцы арышту.

Сёння выйшла на волю палітзняволеная Ларыса Танкашкур — паштарка якую судзілі за распаўсюд асабістых дадзеных сілавікоў. Тэрмін яе прысуду скончыўся.

Ларыса Танкашкур — паштарка з Мінска, якая перадала адміністратару аднаго з тэлеграм-каналаў асабістыя звесткі супрацоўнікаў органаў унутраных спраў, якія яна ўзяла з картатэкі падпісчыкаў выдання МУС «На страже».

Дзеянні жанчыны былі кваліфікаваныя па ч. 1 арт. 179 Крымінальнага кодэкса («Незаконны збор і распаўсюджванне звестак аб прыватным жыцці, якія складаюць асабістую ці сямейную тайну іншай асобы, без яго згоды, якія пацягнулі прычыненне шкоды правам, свабодам і законным інтарэсам пацярпелых»).

На судзе Ларыса Танкашкур прызнала віну часткова: яна прызнала, што распаўсюджвала дадзеныя, але не прызнае, што рабіла гэта па ідэалагічнай і палітычнай непрыязнасці або з помсты.

22 студзеня ёй прысудзілі тры месяцы арышту. 30 чэрвеня яна пачала адбываць тэрмін.