За значок з «Пагоняй». Супрацоўніка музея ВАВ затрымалі ў метро і арыштавалі на 15 сутак

На судзе міліцыянт сцвярджаў, што мужчыну «забралі з кватэры на прафілактычную гутарку».

29-гадовага супрацоўніка музея Вялікай Айчыннай вайны Юрыя Куўшынава затрымалі ўвечары 21 сакавіка ў метро на станцыі «Кастрычніцкая». Увагу міліцыянтаў прыцягнуў значок на заплечніку з гербам «Пагоня». Але ў Ленінскім РУУСе на яго склалі пратакол за «непадпарадкаваньне супрацоўнікам міліцыі», паведаміў тэлеграм-канал «"Вясна" назірае».

У пратаколе напісалі, што Юрыя затрымалі дома за шэсце на вуліцы Ракасоўскага 17 сакавіка і адвезлі ў Ленінскае РУУС, дзе ён нібыта аказаў непадпарадкаванне. Але насамрэч яго затрымалі на станцыі метро «Кастрычніцкая». Там яго спынілі людзі ў цывільным і спыталі пра значок. Потым да Юрыя падышлі амапаўцы і затрымалі яго.

Справу разглядала суддзя Ленінскага раёна Мінску Юлія Інчына. Сведка-міліцыянт на судзе паведаміў, што рабіў «кватэрны абыход асоб, якія ўдзельнічаюць у масавых мерапрыемствах», Куўшынава затрымалі дома і павезлі ў РУУС. Але насамрэч супрацоўнік музея быў на працы і спусціўся ў метро.

Пасля перапынку ў працэсе Інчына зноўку дапытала сведку з-за супярэчнасцей, і тады гэты міліцыянт раптам сказаў, што «праз загружанасцб пераблытаў месца затрымання з-за таго, што супрацоўнікам даводзіцца хадзіць не толькі па кватэрах, але й запрашаць на гутаркі проста на вуліцы».

Нягледзячы на супярэчлівыя паказанні сведкі, суддзя арыштавала Куўшынава на 15 дзён.