Заяўку на «Чарнобыльскі шлях» сёлета падаваць не будуць
З-за пандэміі каронавіруса ў гэтым годзе ў Мінску няма магчымасці правесці «Чарнобыльскі шлях». Ён традыцыйна адбываўся ў гадавіну аварыі на Чарнобыльскай АЭС, якая здарылася 26 красавіка 1986 года.
Па словах кіраўніка Беларускай партыі “Зялёныя” Змітра Кучука, шэраг дэмакратычных арганізацыяў і партыяў, тым не менш, рыхтуюць “Чарнобыльскі тыдзень” з рознымі анлайн-мерапрыемствамі:
— У гэтым годзе, хутчэй за ўсё, будзе адмена “Чарнобыльскага шляху”. Мы не будзем падаваць заяўку. Бо з-за каронавіруса нельга праводзіць масавыя мерапрыемствы. За ўсю гісторыю “Чарнобыльскага шляху” гэта будзе ўпершыню.
Але гэта не значыць, што гадавіна трагедыі забытая. Проста яе адзначэнне адбудзецца ў інтэрнет-прасторы і прыме іншыя формы, якія зараз распрацоўваюцца, — кажа Зміцер Кучук.
Партыя рыхтуе заяву, у якой нагадае аб уроках трагедыі, з якіх, на жаль, высновы не былі зробленыя. Таму што будаваць новую Астравецкую АЭС у Беларусі, вобразна кажучы, на костках ліквідатараў аварыі на Чарнобыльскай АЭС, забыўшы, што большая частка насельніцтва краіны пацярпела ад наступстваў той катастрофы, — гэта недапушчальнае кашчунства ў адносінах да грамадзянаў Беларусі, — кажа Зміцер Кучук.