Зноў затрымалі валанцёра і былога палітвязня Ілью Міронава
Учора, 8 снежня, зноў быў затрыманы гамяльчук Ілья Міронаў, паведамляюць праваабаронцы.
Гэта здарылася, калі валанцёр, які напісаў тысячы лістоў палітвязням і заклікаў працягваць пісаць за краты і цяпер, пайшоў у РАУС на прафілактычную гутарку.
Пазней стала вядома, што валанцёра будуць судзіць сёння, 9 снежня, пасля абеду. Падставы суда пакуль не вядомыя.
Нагадаем, Ілью ўжо затрымлівалі 21 лістапада. Тады яго адправілі за краты на 5 сутак за «распаўсюд экстрэмісцкіх матэрыялаў» (19.11 КаАП) — нібыта за падпіску на «экстрэмісцкі» канал. Калі Ілля выйшаў на волю, ён распавядаў, што цяпер умовы ўтрымання вязняў у ІЧУ «сталі больш жорсткімі не толькі ў параўнанні з мінулым годам, але і нават з умовамі СІЗА, у якім я правёў 389 дзён». Да вязняў-сутачнікаў ставіліся горш, чым да крымінальнікаў, пагоршылася і харчаванне. І «самае галоўнае, што мяне абурыла: камеры былі адназначна перапоўненыя. І там, дзе павінны былі размяшчацца двое, размяшчалі пяцярых, шасцярых, з-за чаго даводзілася спаць на стале, падлозе», — падзяліўся Ілля з журналістамі.
Нагадаем, у кастрычніку былога палітвязня асудзілі да 1,5 года калоніі па «справе Зельцэра» За кратамі да суда яго ўтрымлівалі больш за год, таму пасля суда адпусцілі, бо свой «тэрмін» ён і так адседзеў.
