Журналіста «Трыбуны» затрымалі за шалік. Падобныя носяць заўзятары зборнай і нават кіраўніцтва БФФ (абноўлена)

1 чэрвеня каля 9 раніцы на тэлефон журналісту Дзмітрыю Руто патэлефанавалі — невядомы папрасіў адагнаць аўтамабіль, прыпаркаваны ў двары. Выйшаўшы на вуліцу, Руто ўбачыў каля машыны міліцыянтаў у форме. Тыя паведамілі, што паступіў званок у міліцыю са скаргай ад неабыякавых грамадзян на футбольны шалік ў аўтамабілі, піша «Трыбуна».

Шалік выглядае так. Яшчэ нядаўна падобная атрыбутыка знаходзілася ў вольным продажы і карысталася папулярнасцю ў заўзятараў зборнай Беларусі па футболе.

Раней заўзятараў з такімі шалікамі можна было ўбачыць ледзь не на кожным матчы нацкаманды.

Руто працуе на «Трыбуне» з восені 2019 года. Спецыялізацыя — футбол. Ён не раз пісаў пра матчы зборнай. Не дзіўна, што ў яго ёсць шалік заўзятара каманды. Як даўно ён ляжыць у машыне, невядома.

Характэрна, што ў падобным чырвона-белым шаліку чароўна падтрымліваў зборную намеснік старшыні БФФ Міхаіл Ботнікаў. Так-так, той самы, які раней працаваў у ахове Лукашэнкі, а зусім нядаўна быў злоўлены за стырном у нецвярозым стане (пакуль што без публічных наступстваў для сябе).

Паводле апошняй інфармацыі, Руто знаходзіцца ў Кастрычніцкім РУУСе Мінска ў чаканні пратаколу. Журналіста абвінавачваюць у несанкцыянаваным пікетаванні па артыкуле 24.23 Кодэкса аб адміністрацыйных правапарушэннях. Артыкул прадугледжвае пакаранне ў выглядзе штрафу да 100 базавых велічынь, грамадскіх прац або арышту да 15 сутак.

Абноўлена: як паведамляе «Трыбуна», Дзмітрый Руто знаходзіцца ў ЦІП на Акрэсціна ў статусе абвінавачанага па адміністрацыйнай справе. Судовае пасяджэнне будзе праходзіць у судзе Кастрычніцкага раёна Мінска. Пра дату суда не паведамляецца. Родным удалося перадаць Дзмітрыю цёплыя рэчы і ежу.