65 тысяч долараў атрымае лаўрэат узнагароды Шымборскай
Больш за 200 тысяч злотых (65 тысяч долараў) атрымае лаўрэат узнагароды імя Віславы Шымборскай. Вечарам адбудзецца ўрачыстасць уручэння літаратурнай узнагароды, якую ў сваім завяшчанні заснавала нобелеўская лаўрэатка.
Віслава Шымборска
На конкурс былі дасланыя больш за 180 працаў. У фінале змагаліся пяць найлепшых — кажа старшыня Фонду імя Віславы Шымборскай Міхал Русінэк. “Гэта томы паэзіі аўтараў: Юстыны Баргельскай, Крысціны Дамброўскай, Лукаша Яраша, Кшыштафа Карскага і Яна Палькоўскага”.
Узнагарода імя Шымборскай мае міжнародны характар. Яна прызнаецца штогод за кнігу паэзіі, выдадзеную на польскай мове, як у арыгінале, так і перакладзе. Пераможца атрымае чэк на 200 тысяч злотых.
Узнагарода імя Віславы Шымборскай з’яўляецца найбольш прэстыжнай літаратурнай узнагародай у Польшчы. У склад журы ўваходзяць, між іншым, шведскі перакладчык польскай і французскай літаратуры Андэрс Бадэгард, іспанскі паэт Абэль Сар’яна, эсэіст і паэт Адам Паморскі, крытык і гісторык літаратуры Мар’ян Сталя.