Лявон Вольскі адыграў акустычны канцэрт у Мінску (фотарэпартаж)
Літаральна за дзень
разышліся ўсе квіткі на першы ў гэтым годзе канцэрт Лявона Вольскага ў Мінску.
Гэты акустычны сольны выступ прайшоў у бары «Beer&Wine» 26 студзеня.
Канцэрт складаўся
з дзвюх частак. Першая, па словах музыкі, больш вясёлая і пазітыўная, у другой прагучалі
пераважна лірычныя і кранальныя песні. А распачаўся вечар песнямі з «Народнага
альбому», рэпрэзентацыя якога неўзабаве пройдзе ў Мінску.
Далей былі
хіты часоў N.R.M. Вольскі выканаў крыху забытую кампазіцыю «Трактар» 1995 года,
але зал яму падпяваў. А пасля былі «Я нарадзіўся тут» і «Сонца нам дапаможа».
Другая
палова канцэрта пачалася з песні «Крамбамбулі» «Марскі чалавек». Ну а пасля
былі песні з альбому «Грамадазнаўства»: «Чужы», «Маё каханне», «Ламай сцэнар».
Пасля іх
Вольскі сыграў кампазіцыі са сваёй апошняй кружэлкі «Псіхасаматыка». Музыка
прадстаў некалькі вельмі кранальных кампазіцый: «Чорны квадрат», «Чалавек
ніхто», «На вайне», «Мне трэба ісці».
Прагучалі і
«Пасат універсал», а таксама «Абсэнт». Вечар скончыўся двойчы выхадам на біс з кампазіцыямі
«Дай мне знак» і «Роля героя».
Лявон Вольскі распавёў пра намер сыграць неўзабаве канцэрт з Алесем Францішкам Мышкевічам і прадставіць мінскай публіцы яшчэ больш кампазіцый з «Псіхасаматыкі».