Людміла Уліцкая — Святлане Алексіевіч: «Жадаю табе жыць у краіне, свабоднай ад тупой і прыкрай улады. І сабе зычу таго ж»

«Падзеі ў Беларусі разбурылі маю ідылічную карціну жыцця: стала відавочна, як улада выпускае зубы, калі адчувае пагрозу свайму бестэрміноваму і беззаконнаму існаванню…» — напісала расійская пісьменніца ў лісце да сваёй каляжанкі Святланы Алексіевіч.



 Святлана Алексіевіч

 Святлана Алексіевіч


Нобелеўская лаўрэатка па літаратуры, сябар прэзідыума Каардынацыйнай рады Святлана Алексіевіч звярнулася да расійскай інтэлігенцыі. Яе заява апублікавана на сайце беларускага ПЭН-цэнтра. 

«Я хачу звярнуцца да рускай інтэлігенцыі, назавем гэта так па-старому звычаю. Чаму вы маўчыце? Мы чуем толькі рэдкія галасы ў падтрымку. Чаму вы маўчыце, калі бачыце, як растоптваюць маленькі, годны народ? Мы ўсё яшчэ вашы браты».

Святлана Алексіевіч — апошняя з сямі сябраў прэзідыума Каардынацыйнай рады, якая застаецца на волі. Каб не дапусціць арышту Алексіевіч, у яе кватэры ў Мінску 9 верасня сабраліся еўрапейскія дыпламаты, журналісты, пісьменнікі і яе чытачы.

Усе іншыя сябры Каардынацыйнай рады альбо сілком выправаджаныя з краіны, альбо знаходзяцца ў зняволенні па падазрэнні ў закліках да захопу ўлады. Гэтую крымінальную справу беларускія сілавікі завялі адразу пасля стварэння КР.

«Руская служба ВВС» папрасіла расійскую пісьменніцу Людмілу Уліцкую, якая ў 2012 годзе выстаўляла сваю кандыдатуру на выбарах у расійскую Каардынацыйную раду апазіцыі, адказаць Святлане Алексіевіч. Тая пераслала ліст, які напісала сваёй каляжанцы.

«Беларусь сёння перажывае тое, што, верагодна, давядзецца перажыць праз нейкі час і Расіі. Для ўсіх нас падзеі апошніх тыдняў у Беларусі — мадэль нашай хуткай будучыні. Прычым мадэль добрая…

Ніводнай хвіліны свайго жыцця мне не падабалася ўлада. Ніякая — ні сталінская, ні паслясталінская, ні ўвесь карагод наступных нашых лідараў, ні ўлада паслясавецкая, пуцінская.

Аднак досвед жыцця савецкага чалавека, які правёў большую частку свайго жыцця пад барабанны бой бессаромнай прапаганды, даў мне добры імунітэт. Я не адзін раз казала —сапраўды, мы сёння жывем папросту ў "залатым веку", калі параўнаць наша жыццё з жыццём нашых бацькоў і дзядоў…

Падзеі ў Беларусі разбурылі маю ідылічную карціну жыцця: стала відавочна, як улада выпускае зубы, калі адчувае пагрозу свайму бестэрміноваму і беззаконнаму існаванню…

Усе мы — кажу пра маіх сяброў, аднадумцаў, якіх нямала, — з найвялікшым напружаннем сочым за ўсімі навінамі, якія паступаюць цяпер з Беларусі. Ведаем і пра арышты, і пра з'яўленне новых выдатных лідараў, і разумеем, што ў вашай краіне адбылося падзея, якая заўтра можа адбыцца і ў Расіі.

Я дасылаю табе сардэчнае прывітанне, жадаю здароўя і сіл, зычу табе жыць у краіне, свабоднай ад тупой і прыкрай ўлады. І сабе, дарагая мая, зычу таго ж».

Паводле meduza.io