Следчы камітэт анансаваў узмоцнены кантроль за Threads і TikTok. Хронікі рэпрэсій 11 чэрвеня

 Следчы камітэт заявіў пра намер узмацніць маніторынг публікацый і каментароў у Threads і TikTok і прыгразіў аўтарам кантэнту крымінальнай адказнасцю. Тым часам у Мінску асудзілі сям'ю Корсакавых на тэрміны ад 11 да 14 гадоў зняволення, а праваабаронцы паведамляюць ужо пра больш як 60 ператрусаў у межах «справы ЕГУ».

Следчы камітэт заявіў пра ўзмацненне кантролю за кантэнтам у Threads і TikTok

Следчы камітэт паведаміў, што плануе ўзмацніць маніторынг публікацый і каментароў у сацыяльных сетках Threads і TikTok, піша БАЖ.

Паводле заявы ведамства, асаблівая ўвага будзе надавацца матэрыялам, якія, на думку СК, утрымліваюць «дэзінфармацыю», «распальванне сацыяльнай варожасці», «ілжывыя паведамленні пра небяспеку» або «рэабілітацыю нацызму».

У СК таксама заявілі, што будуць выкарыстоўваць «увесь спектр следчых дзеянняў і міжнароднае супрацоўніцтва» для выяўлення аўтараў такога кантэнту.

Нагадаем, апошнім часам беларускія ўлады актыўна пашыраюць пералік «экстрэмісцкіх матэрыялаў» за кошт акаўнтаў у Threads і TikTok. Толькі ў траўні ў адпаведныя спісы былі ўключаныя дзясяткі старонак з гэтых платформаў.

Сям'ю з Мінска асудзілі на вялікія тэрміны паводле абвінавачанняў у «здрадзе дзяржаве»

Мінскі гарадскі суд 10 чэрвеня вынес прысуд Таццяне Корсакавай, яе мужу Дзмітрыю Корсакаву і іх дачцэ Пелагіі Корсакавай.

Пелагію завочна асудзілі да 11 гадоў пазбаўлення волі.

Дзмітрыю Корсакаву прызначылі 14 гадоў зняволення, а Таццяне Корсакавай — 12 гадоў. Акрамя таго, абодвум прысудзілі штраф у памеры 50 тысяч рублёў.

Дзмітрыя і Таццяну абвінавацілі паводле артыкулаў аб «здрадзе дзяржаве», незаконных дзеяннях са зброяй і незаконным перамяшчэнні праз мяжу зброі, боепрыпасаў і выбуховых рэчываў.

Пелагію прызналі вінаватай паводле артыкула аб «здрадзе дзяржаве».

Акалічнасці справы невядомыя.

Праваабаронцам вядома ўжо пра больш за 60 ператрусаў па «справе ЕГУ»

З пачатку чэрвеня па ўсёй Беларусі працягваецца маштабны пераслед людзей, звязаных з Еўрапейскім гуманітарным універсітэтам.

Паводле інфармацыі праваабарончага цэнтра «Вясна», сілавікі распачалі крымінальную справу, звязаную з аплатай навучання ў ЕГУ з 2016 года.

Праваабаронцам ужо вядома пра больш як 60 ператрусаў у выпускнікоў, студэнтаў, супрацоўнікаў універсітэта і іх родных.

Як паведамлялася раней, допыты і ператрусы працягваюцца. Да некаторых людзей прыходзяць на працу, іншым тэлефануюць і выклікаюць на «размовы».