Пераможцам кінафестывалю Watch Docs стаў фільм Аляксандры Дынько

Сёння ў Галерэі TUT.BY прайшло ўрачыстае ўзнагароджанне лаўрэатаў Міжнароднага фестывалю дакументальнага кіно аб правах чалавека Watch Docs. Пераможцам названы фільм Аляксандры Дынько «Гэтая песня называецца 328». Мантажор і аператар карціны — Таццяна Гаўрыльчык.

У конкурснай праграме таксама былі прадстаўлены фільмы «Лебедзі» галіны Адамовіч, «Трансфармацыя» Рамана Раманава, «Структура» Алісы Ёда і «Трылогія: Беларусь 2020» Андрэя Куціла, Максіма Шведа і Кацярыны Маркавец, паведамляе REFORM.by.

У назву 65-хвіліннага дакументальнага фільма Аляксандры Дынько лег артыкул Крымінальнага кодэкса №328 аб незаконным абароце наркатычных сродкаў.

Стужка распавядае аб кампаніі падлеткаў, якая спрабуе перажыць смерць сяброўкі ад перадазіроўкі экстазі. Сябры баяліся выклікаць хуткую. Па дапамогу звярнуўся толькі Антон, разумеючы, што яму пагражае да 25 гадоў турмы. Падчас турэмнага зняволення, расследаванняў, псіхіятрычных клінік і судовых працэсаў героі сутыкаюцца з пачуццём віны, страты і сапраўднымі турэмнымі тэрмінамі, якія яны лічаць несправядлівымі.

Фільмы-фаварыты конкурснай праграмы вызначаюцца галасаваннем гледачоў, рэжысёрам прысуджаецца грашовая прэмія.

Некамерцыйны фестываль Watch Docs з 2015 года рэгулярна праходзіць у Мінску і ў рэгіёнах. Арганізатары бачаць сваёй мэтай асвету ў галіне абароны правоў чалавека і свабод, павышэнне ўзроўню грамадзянскай актыўнасці і садзейнічанне развіццю і папулярызацыі дакументальнага кіно аб правах чалавека.

Сёлета кінатэатры Мінска адмовілі ў наданні пляцовак для паказу праваабарончых фільмаў.