Выйшаў першы ў гэтым годзе нумар «Дзеяслова»

Свет пабачыў сёлетні першы нумар літаратурна-мастацкага часопіса «Дзеяслоў». Як і заўсёды, ён багаты на паэзію, прозу, пераклады, літаратурную спадчыну, піша «Радыё Рацыя».

Паэтычныя творы на суд чытачоў вынеслі паэты Андрэй Хадановіч, Усевалад Сцебурака, Віктар Сазонаў, Уладзімір Кароткі, Алесь Дуброўскі-Сарочанкаў і Марта Багдановіч. Усе гэтыя паэты розныя і своеасаблівыя. У кожнага з іх свае светаўспрыманні, пачуцці і вобразы. У Андрэя Хадановіча атрымалася добрая «Эмігранцкая песня»:

З галінак чужой прасторы

Збіраем гнёзды свае.

Жабрак з вясёлкавай торбы

Надзею нам падае.


Віктар Сазонаў шчыра піша пра родныя Гальшаны:


Нібыта сцерагуць туманы

І ўсё, што прыйдзе і сышло,

Мае халодныя Гальшаны…

Тут сама цёпла мне было…

Дэбютуе ў «Дзяслове» маладая паэтка Злата Клачок, дзе аўтарка філасофствуе, што «бездань ёсць глыбіня, у якой я шукаю прабачэння…»

Раздзел прозы распачынае ўрывак з фантастычнай кінааповесці «Пацалунак Юніты» Анатоля Бароўскага. З цікавасцю чытаюцца апавяданні Віктара Варанца, Сяргея Машанскага, Сяргея Календы і Алеся Кіркевіча.

Парадуюць чытачоў і пераклады японца Акутагава Руноскэ (апавяданне «О-Гін» у перакладзе Аляксандры Пятровіч), вершы героя Украіны Васіля Стуса ў перакладзе Галіны Дубянецкай і «Валынскія Каты-Легенды» Аляксандра Ірванца ў перакладзе Уладзіміра Арлова.

Добра чытаецца ліставанне Галіны Бурынай з Алесем Разанавым. Вельмі арыгінальная публікацыя Сяргея Шапрана пра літаратурнае сяброўства Рыгора Барадуліна і Уладзіміра Караткевіча. Цікава ўспрымаюцца словы пра кніжнага графіка Кастуся Шаранговіча, якія апублікаваў у часопісе Адам Глобус.

Пра мастацка-вобразнае асэнсаванне немца ў беларускай літаратуры XIX стагоддзя чытачы даведаюцца, калі прачытаюць даследаванне Наталлі Бахановіч, а нататкі пра кнігі Лявона Валасюка «Непрыдуманыя партрэты» і «Далёкая сядзіба» — у артыкуле Юрыя Паталкова «Талент сардэчнай удзячнасці».

Рэдакцыя часопіса «Дзеяслоў» аднавіла апытанку-анкету для літаратараў. На пытанні «Дзеяслова» ў першым нумары адказваюць пісьменнікі Валянціна Аксак і Леанід Галубовіч.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: