Аблава на кампаніі, якія пастаўлялі медыцынскія і фармацэўтычныя тавары

Двух падазраваных затрымалі пры спробе з'ехаць за мяжу. КДК затрымаў службовых асоб пяці прыватных кампаній.

Як сцвярджае КДК, супрацоўнікі неназваных прыватных кампаній дамаўляліся з замежнымі вытворцамі тавараў аб іх пастаўцы ў Беларусь, і тавары ішлі непасрэдна ў адрас беларускіх суб'ектаў гаспадарання, — пра гэта піша «Люстэрка».
«Дакументальна ж пастаўка афармлялася на адрас падкантрольных замежных арганізацый. Тыя ж, у сваю чаргу, павялічваючы цану на тавары па асобных пазіцыях у 4-5 разоў, рэалізоўвалі яе беларускім кампаніям. Пры гэтым пытаннямі набыцця тавараў займаліся службовыя асобы беларускіх арганізацый, а не фірмаў-пасярэднікаў, якія былі ўключаныя ў схему толькі для афармлення здзелак куплі-продажу», — заявілі ў КДК.
Там сцвярджаюць, што розніца ў кошце асядала на рахунках замежных фірмаў-пасярэднікаў, падкантрольных беларускім кампаніям, а самі кампаніі завышалі выдаткі і кошты на медыцынскія і фармацэўтычныя тавары, якія пастаўляюцца ва ўстановы аховы здароўя рэспублікі.
Нанесены дзяржаве ўрон у выглядзе нявыплачаных падаткаў склаў больш за 8 900 000 руб.
У адносінах да заснавальнікаў і кіраўнікоў кампаній узбуджаны крымінальныя справы. Пры гэтым двое з фігурантаў былі затрыманыя ў пункце пропуску «Лоша» пры спробе выехаць за мяжу.
«Падазраваныя далі прызнальныя паказанні і садзейнічаюць расследаванню крымінальных спраў», — адзначылі ў ведамстве.
Канфіскавана больш за 250 тысяч долараў і 55 тысяч еўра. На маёмасць падазраваных, у тым ліку аб'екты нерухомасці і аўтамабілі прэміум-класа, накладзены арышт.