На сустрэчы з Макеем амбасадары краін ЕС падтрымалі мірных пратэстоўцаў

Кіраўнікі місій выказалі захапленне мужнасцю, з якой грамадзяне Беларусі выйшлі на вуліцы ў знак пратэсту супраць фальсіфікацыі выбараў і для абароны свайго права на свабоду і дэмакратычнае прадстаўніцтва.

"Еўрапейскі саюз ўважліва сочыць за развіццём падзей у Беларусі напярэдадні і пасля выбараў. ЕС неаднаразова заклікаў улады Беларусі да пошуку адэкватных рашэнняў з дапамогай спынення гвалту і вядзення сапраўднага і шырокага нацыянальнага дыялогу. Менавіта з улікам гэтых абставінаў кіраўнікі дыпламатычных місій Еўрапейскага Саюзу ў Мінску папрасілі аб сустрэчы з Уладзімірам Макеем, на якую ён ласкава пагадзіўся", — гаворыцца ў паведамленні Еўрасаюза.
Дыпламаты ЕС падкрэслілі, што толькі мірны і дэмакратычны працэс ва ўмовах незалежнасці і свабоды СМІ і моцнай грамадзянскай супольнасці дапаможа адшукаць устойлівыя пастановы. Кіраўнікі місій таксама выказалі захапленне мужнасцю, з якой грамадзяне Беларусі выйшлі на вуліцы ў знак пратэсту супраць фальсіфікацыі выбараў і для абароны свайго права на свабоду і дэмакратычнае прадстаўніцтва. Беларусы заклікаюць свае ўлады да адкрытага дыялогу аб будучыні сваёй краіны.
У гэтым кантэксце еўрапейскія дыпламаты паказалі на недапушчальнасць пераследу членаў Каардынацыйнай Рады на прадстаўленых уладамі падставах. На сённяшняй сустрэчы дыпламаты ЕС нагадалі аб раней накіраваных просьбах дазволіць наведванне імі следчых ізалятараў і шэрагу грамадзян Беларусі, якіх амбасадары ЕС, якія працуюць у Мінску, лічаць арыштаванымі выключна па палітычных матывах.