БДІПЧ АБСЕ накіруе назіральнікаў на парламенцкія выбары ў Беларусі
БДІПЧ АБСЕ (Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе) рыхтуецца накіраваць у Беларусь місію па назіранні за выбарамі ў парламент, гаворыцца на сайце арганізацыі.
«Пасля афіцыйнага запрашэння назіраць за будучымі датэрміновымі парламенцкімі выбарамі, запланаванымі на 17 лістапада 2019 года, і на аснове заключэнняў ацэначнай місіі, у адпаведнасці са сваім мандатам БДІПЧ рыхтуецца да правядзення назірання за выбарамі», — сказана ў паведамленні арганізацыі.
У сувязі з гэтым цяпер БДІПЧ вядзе набор экспертаў, якія ўвойдуць у склад назіральнай місіі. У прыватнасці, арганізацыя шукае кандыдатаў на пасаду кіраўніка місіі, яго намесніка, аналітыка, палітолага, медыя-аналітыка, каардынатара доўгатэрміновых назіральнікаў.
Паводле інфармацыі БДІПЧ, апошні тэрмін прыёму заявак ад кандыдатаў — 2 кастрычніка. Таксама адзначаецца, што яны павінны быць гатовыя адправіцца ў Беларусь для назірання з 13 кастрычніка.
Як паведамлялася, ацэначная місія БДІПЧ АБСЕ пасля правядзення місіі ў Беларусі ў канцы жніўня рэкамендавала правесці назіранне за маючымі адбыцца выбарамі ў беларускі парламент і папрасіла дзяржавы-ўдзельніцы АБСЕ накіраваць 30 доўгатэрміновых назіральнікаў, а таксама 400 кароткатэрміновых назіральнікаў.
Выбары ў Палату прадстаўнікоў Нацыянальнага сходу Беларусі прызначаны на 17 лістапада. Датэрміновае галасаванне пройдзе 12-16 лістапада.