Беларусь — у ліку найменш свабодных краін свету. Хронікі рэпрэсій 1 красавіка

Беларусь атрымала ўсяго 7 балаў са 100 у рэйтынгу Freedom House, улады пагражаюць крымінальнай справай фонду дапамогі дзецям і працягваюць палітычныя прысуды. Таксама пашыраюцца «тэрарыстычныя спісы» і становіцца вядома пра новыя справы.

Беларусь — сярод найменш свабодных краін свету паводле Freedom House

Міжнародная праваабарончая арганізацыя Freedom House апублікавала агляд узроўню свабоды ў свеце за 2025 год. Беларусь атрымала ўсяго 7 балаў са 100 магчымых і апынулася сярод краін з найгоршымі паказчыкамі.

Падрабязную інфармацыю пра Беларусь можна паглядзець тут.

У аглядзе адзначаецца:

«Беларусь — аўтарытарная дзяржава, у якой выбары адкрыта фальсіфікуюцца, а грамадзянскія свабоды істотна абмежаваныя. Сілавікі жорстка збіваюць і адвольна затрымліваюць журналістаў, актывістаў і звычайных грамадзян. Судовая сістэма і іншыя інстытуты не валодаюць незалежнасцю і не стрымліваюць уладу Аляксандра Лукашэнкі».

Фонду «КіндэрВіта» пагражае крымінальная справа

Закрытаму ўладамі фонду дапамогі анкалагічна хворым дзецям «КіндэрВіта» можа пагражаць крымінальная справа.

Пра гэта ў эфіры АНТ паведаміў намеснік начальніка аддзела Дэпартамента фінансавых расследаванняў Камітэта дзяржкантролю Юрый Кардымон, піша Люстэрка.  Паводле сцвярджэнняў прапагандыстаў, частка сабраных сродкаў нібыта выкарыстоўвалася не на лячэнне дзяцей, а на асабістыя патрэбы супрацоўнікаў — у тым ліку на застоллі, алкаголь і забаўляльныя мерапрыемствы.

Частку супрацоўнікаў і валанцёраў фонду таксама абвінавачваюць ва ўдзеле ў пратэстах 2020 года.

У «спіс тэрарыстаў» дадалі яшчэ аднаго беларуса

КДБ абнавіў «спіс асоб, якія маюць дачыненне да тэрарыстычнай дзейнасці».

У ім з’явілася прозвішча 19-гадовага Дзяніса Дзенісенкі, якога завочна асудзілі на 4 гады калоніі паводле ч. 2 арт. 293 КК (удзел у масавых беспарадках).

Цяпер у «тэрарыстычным спісе» 1427 чалавек, з іх 680 — беларусы.

Жыхара Бабруйска асудзілі па чатырох палітычных артыкулах

46-гадовы Кірыл Сарокін з Бабруйска асуджаны паводле шэрагу палітычных артыкулаў, піша «Наша Ніва».

Ён скончыў школу №20, вучыўся ў механіка-тэхналагічным тэхнікуме, працаваў тэхнікам. Мае жонку і дваіх дзяцей. У вольны час пісаў вершы і прозу, вёў блог і публікаваўся на інтэрнэт-пляцоўках.

Яго прызналі вінаватым у:

— «абразе Лукашэнкі» (ч. 1 арт. 368 КК);

— «паклёпе на Лукашэнку» (ч. 2 арт. 367 КК);

— «дыскрэдытацыі Беларусі» (арт. 369-1 КК);

— «садзейнічанні экстрэмізму» (ч. 1 і 2 арт. 361-4 КК).

Прысуд — пазбаўленне волі або «хімія» з накіраваннем (дакладна невядома).

Кіраўніку брэнду Belaruskicry прызначылі 4 гады «хіміі»

Аднаму з кіраўнікоў ювелірнага брэнду Belaruskicry прызначылі чатыры гады абмежавання волі з накіраваннем у папраўчую ўстанову адкрытага тыпу.

Верагодна, гаворка ідзе пра дырэктара па вытворчасці Ягора Бужылава.

Яго асудзілі паводле ч. 1 арт. 361-1 КК («стварэнне экстрэмісцкага фармавання»).

Паводле версіі следства, мужчына «прытрымліваўся радыкальных антыдзяржаўных поглядаў» і вырабляў прадукцыю з «дэструктыўнай сімволікай».

Па «справе дваровых чатаў» асудзілі найменей 50 чалавек

КДБ прызнаў ініцыятыву «Ордэн», якая аб’ядноўвала шэраг дваровых чатаў, «экстрэмісцкім фармаваннем» яшчэ ў кастрычніку 2024 года.

19 сакавіка ў Мінскім гарадскім судзе вынеслі прысуд па гэтай справе — асудзілі восем жанчын.

Іх абвінавацілі паводле арт. 357 КК («змова з мэтай захопу ўлады»).

Паводле праваабаронцаў:

— агулам асуджаныя найменей 50 чалавек;

— 39 з іх — жанчыны;

— 46 палітвязням прызначылі ад 2 да 10 гадоў калоніі;

— 26 чалавек памілавалі;

— за кратамі застаецца найменей 21 чалавек.

Супрацоўніцу ўніверсітэта культуры асудзілі па палітычнай справе

57-гадовую Наталлю Дзядзюлю асудзілі ў Мінскім гарадскім судзе, піша «Наша Ніва».

Яна скончыла гістфак БДУ і доўгі час працавала ў Беларускім дзяржаўным універсітэце культуры і мастацтваў.

Жанчыну прызналі вінаватай паводле:

— ч. 1 арт. 130 КК (распальванне варожасці);

— ч. 1 і 2 арт. 361-4 КК (садзейнічанне экстрэмісцкай дзейнасці).

Ёй прызначылі «хатнюю хімію», дакладны тэрмін невядомы.