Фільм Сцяпана Пуцілы пра Лукашэнку прызнаны экстрэмісцкім

Youtube-відэаролік з назвай «Лукашэнка. Залатое дно» ўнесены ў «Рэспубліканскі спіс экстрэмісцкіх матэрыялаў».

Мінінфарм сёння апублікаваў абноўленую версію спіса. У ім прыводзіцца канкрэтная спасылка на відэа, перадае REFORM.by.

Фільм выйшаў на YouTube 8 сакавіка. За гэты час ён набраў 6,5 млн. праглядаў толькі на канале Пуцілы.

Лукашэнка абверг інфармацыю пра яго багацце, якая змяшчаецца ў фільме. Ён заявіў, што ў роліку не ўтрымліваецца нічога новага неўзабаве пасля выхаду фільма.

«Яны ўзяліся за гэтую тэму дарма. Гэта калька з фільма пра Пуціна. Палацы там, яшчэ нешта, і ў штаны залезлі ў канцы. Слухайце, ну, гэта наогул ужо непрыстойна. Прытым называюць канкрэтныя прозвішчы, якія не маюць ніякага дачынення, клянуся вам. Навошта?» — сказаў Лукашэнка 13 сакавіка.

Пасля гэтага ён не раз падкрэсліваў, што ў яго няма асабістай уласнасці, усё — дзяржаўнае. Трэба адзначыць, што ў фільме не было прад’яўлена доказаў таго, што нейкая ўласнасць належыць асабіста Лукашэнку.

«Там база адпачынку і драўляны дом, дзе прэзідэнт спыняецца. Адна частка грамадская. Агульная зала вялікая. Мая спальня і дзіцячая. Усе. Ну што гэта, палац? Дык ён жа не мой. Гэта дзяржаўны», — адзначыў Лукашэнка.

Акрамя роліка Пуцілы, у спіс матэрыялаў дададзеныя некалькі рэгіянальных чатаў і тэлеграм-каналаў, аб прызнанні якіх экстрэмісцкімі ў апошнія тыдні паведамлялі МУС і Генпракуратура.