Як адзначалі НГ ваяры палка імя Каліноўскага?

Напярэдадні свята нашыя хлопцы штурмавалі пазіцыі расійцаў. Некалькі жаўнераў атрымалі раненні. А апоўначы заспявалі «Пагоню». Ваяр палка Аляксандр «Кусь» Клачко распавёў журналістам «Нашай Н*вы» падрабязкі.

Навагодні зварот палка Каліноўскага агучылі камандзір падраздзялення Дзяніс «Кіт» Прохараў, камандзір батальёна «Літвін» Ігнат «Булак» Кірэеў і камандзір батальёна «Волат» Ян «Беларусь» Мельнікаў. Яны адрасавалі яго суайчыннікам — як тым, якія змагаюцца супраць рэжыму Лукашэнкі, так і тым, хто «працягвае жыць пад прыгнётам дыктатуры» ці падтрымлівае яе.
Першым прамаўляў Дзяніс Прохараў.
«Шаноўныя беларусы і беларускі, усе тыя, хто разам з намі змагаецца супраць расійскай агрэсіі ва Украіне, і ўсе, хто ў выгнанні з нашай роднай Беларусі, — сказаў ён. — Усе, каго лёс занёс у розныя куткі свету, і тыя, хто працягвае жыць пад прыгнётам дыктатуры.
Усе, хто ў поўнай меры адчувае катаванні, а таксама ўсе, хто да гэтага часу не заўважае гэтай самай дыктатуры ці робіць такі выгляд. Тыя, хто яе пакуль падтрымлівае. Усе, хто ля станка і пакуль што ў пагонах. Усе, хто вучыць, лечыць, займаецца бізнесам, спортам і мастацтвам у гэты нялёгкі час. Падыходзіць да заканчэння 2022 год».
«У гэтым годзе, — працягнуў Ігнат Кірэеў, — мы стварылі беларускі полк імя Кастуся Каліноўскага, які стаў побач з украінцамі ў вайне супраць расійскай агрэсіі і паставіў сабе мэту — вызваленне Беларусі праз вызваленне Украіны.
Гэты год быў годам барацьбы, развіцця і сапраўдных выпрабаванняў. Мы ўдасканальвалі свае навыкі і выконвалі баявыя заданні ў найгарачэйшых месцах фронту».
«Нас становіцца ўсё больш і больш, — казаў ён. — На вялікі жаль, мы таксама трацім нашых пабрацімаў, чые імёны назаўжды застануцца ў нашай памяці і ў памяці ўсяго беларускага народа».
«Наперадзе нас чакае яшчэ адзін год змагання, — працягваў Ян Мельнікаў. — Год, у якім трэба выстаяць дзеля тых, хто загінуў. Хто цяпер у турме і пакутуе. Дзеля тых, хто рабіў гісторыю ўчора і робіць яе сёння.
Мы — новая кагорта беларусаў, якія змагаюцца за сваю нацыю і за ганаровае імя нашчадкаў полацкіх дружыннікаў, рыцараў Вялікага Княства Літоўскага, ваяроў Каліноўскага, нашчадкаў БНР. Сэрцы ўсіх нашых людзей прагнуць перамогі над акупантам і іхнімі прыхваснямі ў Беларусі. Мы зробім усё магчымае дзеля гэтага», — казаў ён.
«Беларускі полк імя Каліноўскага абяцае і надалей стаяць у абароне Украіны і прыкласці максімум высілкаў, каб мэта нашага народа здзейснілася і Беларусь стала свабоднай у новым годзе, а дзяржава была для народа згодна з запаветам Кастуся Каліноўскага.
«Час прыйдзе, беларусы. З новымі сіламі ў новы 2023 год. Жыве Беларусь», — падсумаваў Ян Мельнікаў.
«Мая мэта — вызваліць Беларусь»
У апошні дзень 2022 года каліноўцы штурмавалі расійскія пазіцыі. Баец Аляксандр «Кусь» Клачко распавёў, што ў складзе разліку падтрымліваў саслужыўцаў агнём. Паводле яго слоў, двое каліноўцаў атрымала лёгкія раненні, а ў праціўніка быў, прынамсі, адзін забіты.

Па выкананні задання каліноўцы вярнуліся на базу, накрылі стол. Навагоддзе сустрэлі песняю на словы Максіма Багдановіча «Пагоня».
«Гэта не было запланавана, але нехта ўключыў на тэлефоне нашу «Пагоню». Усе ўсталі, прыклалі руку да сэрца і падпявалі. Гэта быў вельмі моцны і кранальны момант. Яго нельга пераказаць словамі», — апавядае Аляксандр.
2022 год каліновец называе звычайным годам, у які адбываюцца «важныя гістарычныя падзеі».
Аляксандр кажа, што 2022 год дазволіў яму зразумець, што найвялікшымі для яго каштоўнасцямі з'яўляюцца воля і годнасць.

«Гэты год даў мне вайсковы досвед, які тым самым наблізіў мяне да здзяйснення маёй мэты. Мая мэта — гэта вызваленне Беларусі».