Літва крыху спрасціла беларусам патрабаванні да ўвозу прадуктаў

Літва дазволіла беларусам увозіць прадукты ў адкрытых упакоўках і тавары для асабістага карыстання.

Літоўская мытня выпусціла тлумачэнні, што цяпер можна будзе правезці ў краіну з Беларусі,  піша «Люстэрка».

«Забарона не распаўсюджваецца на тавары, якія перавозяцца транзітам, а таксама на тавары, якія прызначаны толькі для асабістага выкарыстання падчас паездкі (г.зн. на тыя, дзе ўпакоўкі былі адкрытыя)», — гаворыцца ў паведамленні.

У літоўскай мытні ўдакладнілі, што забарона таксама не распаўсюджваецца на прадукты, неабходныя ў падарожжы, — але яны таксама павінны быць у адкрытых упакоўках.

Нагадаем, з 3 чэрвеня ўрад Літвы ўвёў новы пералік тавараў, якія забароненыя для імпарту з Беларусі і Расіі. У спіс трапілі жывыя жывёлы, мяса і субпрадукты, рыба, малако і прадукты з яго, яйкі, натуральны мёд, расліны, гародніна, садавіна, кава, збожжавыя, крупы, алей, напоі, тытунёвыя вырабы і іншыя прадукты — усяго больш за 2800 пазіцый.

Забарона на ўвоз застаецца ў дачыненні мяса-малочнай прадукцыі, вызначанай Дзяржаўнай харчовай і ветэрынарнай службай Літвы, зрэшты, такая забарона была і раней, яшчэ да 25 красавіка, калі Сейм Літвы прыняў закон аб забароне ўвозу сельскагаспадарчай прадукцыі і кармоў з Расіі і Беларусі.

Праз гэтыя санкцыі на мяжы з Літвой узніклі праблемы — у літоўскіх пунктах пропуску тым, хто ўязджаў з Беларусі, прапаноўвалі выкідваць прадукты, напоі (у тым ліку звычайную ваду), цыгарэты, лекі і іншыя тавары, нават тыя, якіх няма ў абмежавальным спісе. 

У пакоях надгляду ўтварыліся горы з выкінутых прадуктаў.

Перагоншчыкі ў ступары. Літоўская мытня ўводзіць новыя правілы вывазу аўтамабіляў у Беларусь

3 чэрвеня офіс Святланы Ціханоўскай паведаміў, што былі праведзеныя кансультацыі з літоўскімі ведамствамі з нагоды забароны на правоз прадуктаў праз мяжу. У офісе заявілі, што» вельмі спадзяюцца», што санкцыі на ўвоз аграпрамысловай прадукцыі фізічнымі асобамі з Беларусі ў Літву будуць «змякчаныя або ўдакладненыя».

Акрамя таго, з 1 ліпеня некаторыя сельскагаспадарчыя прадукты і кармы з Расіі і Беларусі будуць абкладацца больш высокімі імпартнымі тарыфамі Еўрасаюза, што забяспечвае бесперабойнае функцыянаванне Адзінага рынку і Мытнага саюза ЕС, нагадвае Свабода.

Мытная служба адзначыла, што Літва як сябар ЕС падтрымлівае прынятыя на ўзроўні ЭЗ захады па абмежаванні імпарту з Расіі і Беларусі.