МУС назвала пяць чалавек, якіх лічыць датычнымі да «Наш Дом». Хронікі рэпрэсій 3 верасня
Беларускія ўлады працягваюць пераследаваць людзей за палітычную і грамадскую дзейнасць. МУС назвала пяць чалавек, якіх лічыць датычнымі да «экстрэмісцкага фармавання» «Наш Дом», 24-гадовага жыхара Асіповічаў асудзілі паводле палітычнага артыкула, а былы палітвязень распавёў, як сілавік прапаноўваў яму паехаць на вайну ва Украіне.
МУС назвала пяць чалавек, якіх лічыць датычнымі да «Наш Дом»
МУС Беларусі апублікавала імёны пяці чалавек, якіх лічыць датычнымі да «экстрэмісцкага фармавання» «Наш Дом». У спісе з'явіліся Вольга Карач, Сяргей Спарыш, Вячаслаў Андрэеў, Кацярына Мамінава і Вікторыя Лайкова.
Адпаведнае рашэнне КДБ было прынята 1 верасня.
Грамадскую кампанію «Наш Дом» прызналі «экстрэмісцкім фармаваннем» 4 траўня 2022 года. Раней прозвішчы людзей, якіх МУС лічыць датычнымі да фармавання, у спісе не ўказваліся.
Былому палітвязню пасля вызвалення сілавік прапанаваў адправіцца на вайну ва Украіне
Пасля поўнага адбыцця пакарання выпрабаванні для Сяргея (імя змененае ў мэтах бяспекі) не скончыліся. Мужчына вызваліўся летам 2026 года і адразу адчуў, што сістэма працягвае на яго ціснуць, піша «Вясна».
Пасля вызвалення Сяргей павінен быў стаць на ўлік у РУУС. Там яму запатрабавалі тэрмінова ўладкавацца на працу. Пакуль ён гэтага не зробіць, яму давялося б штодня прыязджаць у РУУС і адзначацца.
Аднак інспектар прапанаваў яму нечаканы «выхад» з сітуацыі — паехаць на вайну ва Украіне.
«Глядзі, тады ў цябе застаецца толькі адзін варыянт. Трэба ехаць на СВА. Вось у нас ужо трое паехала такіх, як ты, палітычных, якія ў “спісах тэрарыстаў”. Праўда, толькі адзін вярнуўся, але прывёз з сабой 40 тысяч даляраў. Разумееш, якія багацці там?»
Сяргей адказаў, што гэта найміцтва і за яго прадугледжаная крымінальная адказнасць. Але інспектар запэўніваў, што ў выпадку ўдзелу ў вайне ўсё можна будзе «вырашыць».
24-гадовага жыхара Асіповічаў асудзілі паводле палітычнага артыкула
Судовы працэс над Мікітам Міхадзюком прайшоў у Мінскім гарадскім судзе. На гэта звярнула ўвагу «Наша Ніва».
Хлопца прызналі вінаватым паводле ч. 1 арт. 14 і ч. 1 арт. 361-4 Крымінальнага кодэкса — «замах на садзейнічанне экстрэмісцкай дзейнасці».
Мікіту, верагодна, прысудзілі «хатнюю хімію».
BELPOL і некалькі друкаваных выданняў дадалі ў спіс «экстрэмісцкіх матэрыялаў»
Міністэрства інфармацыі абнавіла «Рэспубліканскі спіс экстрэмісцкіх матэрыялаў». На гэты раз у яго трапілі:
— акаўнт у X (Twitter) «BELPOL»;
— TikTok-акаўнт «pawka»;
— кнігі і друкаваныя выданні на kamunikat.org: «Вяртанне на Радзіму: вершы, пераклады, зацемкі» і «Нябесны лён».