Навумчык: Усе «гарантыі» Лукашэнку не маюць значэння

Палітыка

Як Лукашэнка адмяняў гарантыі іншым, гэтак жа лёгка могуць быць адмененыя гарантыі і яму самому, лічыць палітычны аглядальнік Сяргей Навумчык.

Палац Незалежнасці, адна са шматлікіх рэзідэнцый Лукашэнкі. Ілюстрацыйнае фота «НЧ»

Палац Незалежнасці, адна са шматлікіх рэзідэнцый Лукашэнкі. Ілюстрацыйнае фота «НЧ»

— Усе гэтыя «гарантыі» Лукашэнку пасля адстаўкі (пры тым, што я ўжо не першы год кажу — не будзе ніякага «транзіту ўлады»), — піша Сяргей Навумчык у сваім ТГ-канале. — Не маюць аніякага значэння. Адменяць іх за пяць секунд.

Гэтаму ёсць прыклад у нашай найноўшай гісторыі, і даў яго ніхто іншы, як сам Лукашэнка.

На пачатку 1995-га, напярэдадні парламенцкіх выбараў, Вярхоўны Савет XII склікання прыняў папраўкі ў Закон «Аб статусе дэпутатаў». Былым дэпутатам ВС прадугледжваліся льготы. Там засталіся і ранейшыя, цалкам справядлівыя (напрыклад, працаўладкаванне на пазіцыю, роўную той, якую дэпутат займаў да свайго абрання). Але былі і новыя: пажыццёвае медыцынскае абслугоўванне ў «лечкамісіі», пажыццёвыя льготы пры набыцці квіткоў на транспарт, на аплату камунальных паслуг, нарэшце, права выхаду на пенсію ў 55 гадоў (ці, здаецца, нават у 50), з пенсіяй у памеры не менш як 75% акладу дзеючага міністра. І шмат чаго падобнага.


Глядзіце таксама

Мы, дэпутаты БНФ, за новыя льготы не галасавалі і нават прынялі на гэты конт палітычную заяву. Абурыўся гэтым і Лукашэнка. Магчыма, адзіны выпадак, калі нашы і яго пазіцыі супалі.

Лукашэнка закон пра гарантыі былым дэпутатам практычна адразу ж адмяніў — хаця аніякага фармальнага канстытуцыйнага права на гэта не меў.

Будуць ліквідаваныя і прызначаныя Лукашэнкам самому сабе і свайму сямейству гарантыі і льготы.

За выключэннем аднаго: ахова былога прэзідэнта «у месцы яго знаходжання».

Дакладней — у месцы яго зняволення.


Глядзіце таксама

Нагадаем, на днях Лукашэнка падпісаў папраўкі ў «прэзідэнцкі» закон, якія былі прынятыя напрыканцы мінулага года Палатай прадстаўнікоў і Саветам рэспублікі. Гарантыі прэзідэнту, які выконвае свае паўнамоцтвы, уключаюць дзяржаўнае забеспячэнне і абслугоўванне. Акрамя таго, у новую рэдакцыю закона ўключаны:

  • заработная плата ў адпаведнасці з заканадаўствам;
  • памяшканні для пражывання, часовага знаходжання і (або) адпачынку;
  • транспартнае абслугоўванне;
  • матэрыяльна-тэхнічнае забеспячэнне, сацыяльнае-бытавое і іншае абслугоўванне;
  • дзяржаўная ахова, якая ўскладаецца на дзяржаўны орган спецыяльнага прызначэння;
  • выдаткі на прадстаўнічыя мэты ўнутры краіны;
  • выдаткі, звязаныя з наведваннем замежных дзяржаў;
  • медыцынскае абслугоўванне;
  • абавязковае дзяржаўнае страхаванне;
  • урадавая і спецыяльная сувязь.

Усе гарантыі, за выключэннем зарплаты, распаўсюджваюцца на членаў сям'і прэзідэнта на працягу тэрміну яго паўнамоцтваў.