Палітвязні, «шпіёны» і новыя «экстрэмісты». Хронікі рэпрэсій 16 студзеня
У Беларусі працягваюцца рэпрэсіі: сілавікі пашыраюць справы пра «здраду дзяржаве», абнаўляюць «экстрэмісцкія» спісы і асуджаюць за мірнае выказванне пазіцыі. Сабралі галоўнае за апошнія дні.
Што вядома пра «справу радыёклуба»
15 студзеня на СТВ выйшаў прапагандысцкі фільм «Без прыкрыцця», дзе сцвярджалася, што КДБ нібыта «нейтралізаваў сетку», якая пад выглядам радыёхобі займалася шпіянажам. У сюжэце гаворка ідзе пра сем чалавек, узятых пад варту па артыкулах «здрада дзяржаве» і «шпіянаж», аднак публічна паказалі толькі двух — Мікіту Красько і Андрэя Рэпеція.
Вядоўца Раман Пратасевіч заявіў, што фігурантам пагражае пажыццёвае зняволенне або смяротнае пакаранне. Аднак такое пакаранне магчымае толькі пры наяўнасці спецыяльнага статусу (вайсковец або службовая асоба). Верагодна, адзін з затрыманых мог мець вайсковае мінулае.
Паводле інфармацыі праваабаронцаў, Красько, Рэпецій і трэці фігурант — Вячаслаў Бянько — утрымліваюцца ў СІЗА КДБ больш за год. Справа засакрэчаная, суд яшчэ не прызначаны.
Прапаганда сцвярджае, што затрыманыя нібыта атрымлівалі доступ да закрытых радыёчастот сілавых структур і перадавалі звесткі замежным спецслужбам, аднак ні доказаў, ні канкрэтных адрасатаў у сюжэце не агучылі. Таксама былі агучаныя лічбы пра «больш за 50 прыцягнутых да адказнасці» і сотні канфіскаваных прылад — без удакладненняў, у якім статусе гэтыя людзі і за што менавіта.
Паводле «Нашай Нівы», усе трое — людзі з тэхнічным бэкграўндам, для якіх радыёсувязь была хобі або прафесійнай цікавасцю, а не пацверджанай «шпіёнскай дзейнасцю».
Беларусь і Расія ствараюць адзіны «рэестр экстрэмістаў»
Беларусь і Расія прапрацоўваюць механізм стварэння агульнага «рэестра экстрэмістаў». Пра гэта паведаміў старшыня камісіі Парламенцкага Сходу Саюзнай дзяржавы па бяспецы Генадзь Ляпешка.
Паводле яго слоў, ідэя ў тым, каб асобы або рэсурсы, прызнаныя «экстрэмісцкімі» ў адной з краін, аўтаматычна лічыліся такімі і ў другой.
У «спіс экстрэмістаў» дадалі яшчэ 30 чалавек
16 студзеня МУС абнавіла «Пералік грамадзян, якія маюць дачыненне да экстрэмісцкай дзейнасці». Цяпер у ім 6205 чалавек.
Сярод новых прозвішчаў — грамадзянін Расіі Канстанцін Дзмітрыеў, мастачка Аксана Шаляпіна, а таксама 18-гадовая Ганна Старацітарава.
Апошнюю версію спіса апублікавала «Вясна».
Неўролага Руслана Бадамшына асудзілі да 2,5 гадоў калоніі
У Мінску асудзілі вядомага неўролага Руслана Бадамшына — яму прызначылі два з паловай гады пазбаўлення волі ў калоніі агульнага рэжыму. Пра гэта паведамляе @belhalat_by.
Паводле «Вясны», лекара затрымалі ў чэрвені 2025 года паводле арт. 361-4 КК («садзейнічанне экстрэмісцкай дзейнасці»). Папярэдне, прысуд звязаны са «справай Беларускага Гаюна».
Пасля выбараў Руслана Бадамшына затрымлівалі як мінімум пяць разоў — у суме ён адбыў больш за 60 сутак адміністрацыйнага арышту.
У Беларусі +5 новых палітвязняў
Палітвязнямі прызналі Іллю Барыскевіча, Аляксандра Чыжа, Сяргея Саўчкова, Змітра Кегелева і Уладзіміра Івашкевіча.
Усе яны падвергліся пераследу і пазбаўленню волі за «абразу Лукашэнкі» і іншыя формы мірнай рэалізацыі свабоды меркаванняў.