Святлана Ціханоўская прызначыла Аляксандра Шлыка спецыяльным прадстаўніком па выбарах

Аляксандр Шлык — эксперт па выбарах. Апошнія 10 гадоў ён працаваў у аддзеле па выбарах БДІПЧ АБСЕ, з 2016 года быў яго кіраўніком. У гэтым якасці кіраваў наглядам за ўсімі выбарамі ў рэгіёне АБСЕ. Дапамагаў краінам прыводзіць іх выбарчыя працэсы ў адпаведнасць з міжнароднымі стандартамі, гаворыцца ў паведамленні.

Аляксандр Шлык скончыў эканамічны факультэт БДУ, магістратуру па паліталогіі Цэнтральна-Еўрапейскага Універсітэта (Венгрыя), магістратуру па міжнароднаму развіццю і кіраванню Лундскага Ўніверсітэта (Швецыя).

У якасці прадстаўніка па выбарах Шлык будзе кіраваць падрыхтоўкай заканадаўчай і практычнай базы для правядзення дэмакратычных выбараў, арганізоўваць грамадскія кансультацыі падыходаў да выбарчай рэформы, каардынаваць працу з міжнароднымі партнёрамі і экспертамі ў сферы выбараў.

Аляксандр Шлык: «Падзеі з 9 жніўня 2020 паказалі, што грамадзяне Беларусі хочуць сумленных і празрыстых выбараў і не гатовыя мірыцца з фальсіфікацыямі. Мы будзем працаваць над тым, каб дэмакратычныя выбары былі заснаваныя на дакладных і справядлівых правілах, сталі зразумелай і блізкай усім мэтай, а пасля мірных пераўтварэнняў рэальнасцю ў новай Беларусі».