А фашыст усё роўна ты. Расійскі гоншчык прадэманстраваў нацысцкую «зігу» падчас узнагароджання (відэа)

Расійскі гоншчык Арцём Севярухін прадэманстраваў нацысцкае прывітанне падчас цырымоніі ўзнагароджання на юніёрскім чэмпіянаце Еўропы па картынгу, піша unian.net.

Севярухін, які з-за санкцый супраць Расіі выступае пад італьянскім сцягам, заняў першае месца ў гонцы першага этапу турніру ў партугальскім Портымау. На п'едэстале расіец паказаў нацысцкі жэст і пачаў смяяцца.

Варта адзначыць, што ў сацыяльных сетках заўзятары асудзілі ўчынак расійца і патрабуюць яго пажыццёвай дыскваліфікацыі.

У прыватнасці, вядомы ўкраінскі гоншчык Іван Пеклін заклікаў Міжнародную аўтамабільную федэрацыю (FIA) да дзеянняў.

«Пакуль тысячы людзей паміраюць у маёй краіне ад рук расійскіх захопнікаў, пакуль хтосьці кажа, што спорт па-за палітыкай, мы можам бачыць паводзіны расійскага гоншчыка на подыуме чэмпіянату Еўропы. Я заклікаю ФІА да дзеянняў», — напісаў Пеклін у Instagram.

Гэты турнір праходзіць пад эгідай Міжнароднай аўтамабільнай федэрацыі (FIA), але пакуль санкцый супраць гоншчыка або нейкіх афіцыйных заяў зроблена не было.