«Хворых яшчэ шмат». У футбольным клубе БАТЭ эпідэмія каронавіруса

Пра гэта распавёў галоўны трэнер барысаўскай каманды Віталь Жукоўскі.

20210904163112.jpg

Галоўны трэнер БАТЭ Віталь Жукоўскі распавёў клубнаму сайту, як у камандзе ідуць справы са здароўем і інфіцыраванымі каронавірусам.

— Згулялі спарынг, паколькі тыднёвы цыкл трэба падтрымліваць — гэта норма. Плюс многія хлопцы пасля хвароб: хацелася, каб яны атрымалі практыку. А яшчэ ў нас дастаткова перспектыўнай моладзі, якая павінна знаходзіцца ў тонусе, развівацца — і адпавядаць узроўню БАТЭ. Сёння атрымалася добра, а псіхалогія прыходзіць з часам. Майка БАТЭ ўсё-ткі цісне на маладых. Калі яны выходзяць на поле «Барысаў-Арэны» , то ў нас з гэтым пачынаюцца сур'ёзныя праблемы, хоць хлопцы могуць гуляць нашмат мацней. Трэба, каб яны праяўлялі сябе так, як у сённяшнім матчы. А ў памылках няма нічога страшнага. Проста пасля іх трэба працягваць рабіць тое, што ўмееш — і не сыходзіць у сябе. Гэта і тлумачым маладым хлопцам. У цэлым жа спарынг спадабаўся зараджанасцю каманды: відаць, ужо засумавалі па галах і перамогах. Так што мы добра папрацавалі.

— Якая кадравая абстаноўка ў камандзе напярэдадні вельмі важнага адрэзка чэмпіянату?

— Хворых яшчэ шмат, аднак БАТЭ вельмі старанна ставіцца да здароўя футбалістаў: вынік важны, але гэта важней. Мы пастаянна робім ПЦР-тэсты. Ці, напрыклад, ёсць такія моманты, што хварэе ўся сям'я, а футбаліст не — у падобнай сітуацыі не можам дапусціць яго да працы з камандай. Гэта выключана. Паўтаруся, клопат пра здароўе вельмі важны.

Паводле «Прэсболу».