Вядомую амерыканскую баскетбалістку асудзілі ў Расіі на дзевяць гадоў калоніі

Хімкінскі гарадскі суд асудзіў амерыканскую баскетбалістку Брытні Грайнер на дзевяць гадоў калоніі паводле абвінавачвання ў захоўванні і кантрабандзе наркотыкаў, паведамляе «Інтэрфакс».

Абвінавачванне прасіла прызначыць ёй пакаранне ў выглядзе дзевяці з паловай гадоў пазбаўлення волі.

Пасля прысуду Белы дом апублікаваў заяву прэзідэнта ЗША Джо Байдэна аб тым, што яго адміністрацыя «працягне нястомна працаваць і выкарыстоўваць усе магчымыя спосабы» для вызвалення Грайнер і іншага асуджанага ў РФ амерыканца Пола Уілана. На думку Байдэна, Грайнер была затрыманая ў Расіі незаконна.

Грайнер, якая паспяхова выступала за клубы і ў ЗША, і ў Расіі, была затрыманая ў аэрапорце Шарамеццева ў лютым 2022 года. У яе багажы, як сцвярджаецца, быў выяўлены гашышны алей для вейпа.

Расія і ЗША абмяркоўваюць магчымы абмен Грайнер і Пола Уілана на расійцаў, якія знаходзяцца ў зняволенні ў ЗША. Часцей за ўсё ў якасці кандыдата на абмен называюць асуджанага па абвінавачванні ў кантрабандзе зброі Віктара Бута. Паводле неафіцыйных звестак, Расія патрабуе ад ЗША ў абмен на Грайнер і Уілана дваіх чалавек.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: