ААН заклікала свет сабраць 1,7 мільярда долараў на дапамогу Украіне

Паводле ацэнак ААН, у падтрымцы ў бліжэйшыя месяцы будуць мець патрэбу 12 мільёнаў украінцаў унутры краіны і больш за 4 мільёны бежанцаў, паведамляе www.dw.com.

Арганізацыя Аб'яднаных Нацый (ААН) звярнулася да сусветнай супольнасці з заклікам выдзеліць 1,7 мільярда долараў для аказання тэрміновай гуманітарнай дапамогі насельніцтву Украіны ва ўмовах ваеннага ўварвання Расіі. Паводле ацэнак Сусветнай арганізацыі, у бліжэйшыя месяцы каля 12 мільёнаў чалавек унутры Украіны і больш за 4 мільёны ўкраінскіх бежанцаў у суседніх краінах будуць мець патрэбу ў дапамозе і абароне, паведаміла ўпраўленне ААН па каардынацыі гуманітарных пытанняў (УКГП) у аўторак, 1 сакавіка.

"Гэта самая змрочная гадзіна для народа Украіны, — заявіў намеснік генеральнага сакратара ААН па гуманітарных пытаннях Марцін Грыфітс. — Цяпер нам неабходна актывізаваць нашы намаганні для абароны жыцця і годнасці простых украінцаў. Мы павінны праявіць спачуванне і салідарнасць".

Па словах генеральнага сакратара ААН Антоніу Гутэрыша, сабраныя сродкі пойдуць у ліку іншага на прадастаўленне жылля, медыцынскай дапамогі і пітной вады. Пры неабходнасці арганізацыя пашырыць існуючыя праграмы дапамогі або створыць новыя, сказаў ён.

У ААН ацанілі колькасць бежанцаў з Украіны амаль у 700 тысяч чалавек

Вярхоўны камісар ААН па справах бежанцаў Філіпа Грандзі паведаміў журналістам у Жэневе, што толькі за апошнія 24 гадзіны Украіну пакінулі яшчэ 150 тысяч чалавек, у выніку чаго агульная колькасць бежанцаў дасягнула парадку 677 тысяч. Ён адзначыў, што гэта "выклікае надзвычайную занепакоенасць".