Байдэн сустрэўся з вайскоўцамі ЗША ў Польшчы, ля мяжы з Украінай
Прэзідэнт ЗША Джо Байдэн падчас візіту ў Польшчу ў пятніцу заявіў, што краіны Захаду ўвялі супраць Расіі самыя жорсткія ў гісторыі «караючыя» санкцыі — у сувязі з яе ўварваннем ва Украіну. Ён дадаў, што санкцыі будуць узмацняцца жорсткасць, перадае Св*бода.
Джо Байдэн сустракаецца з амерыканскімі вайскоўцамі ў Польшчы
Джо Байдэн наведаў горад Жэшаў недалёка ад мяжы з Украінай. Там размешчаная база, куды прыбывае гуманітарны і ваенны груз для Украіны. Прэзідэнт ЗША сустрэўся з вайскоўцамі 82-й паветрана-дэсантнай дывізіі арміі Злучаных Штатаў, якія зараз дыслакаваныя ў Польшчы. У салдацкай сталовай ён паспрабаваў піцу. Байдэн заявіў вайскоўцам, што яны «лепшыя салдаты ў свеце» і падзякаваў ім за службу.
«Вы знаходзіцеся ў эпіцэнтры барацьбы паміж дэмакратыямі і алігархамі», — сказаў Байдэн, па ўсёй бачнасці, маючы на ўвазе расійскіх бізнесоўцаў, якія трапілі пад санкцыі за падтрымку Уладзіміра Пуціна.
Пасля гэтага Байдэн сустрэўся з прэзідэнтам Польшчы Анджэем Дудам і разам з ім правёў сустрэчу з работнікамі гуманітарных місій, якія аказваюць дапамогу ўкраінскім уцекачам. Прэзідэнт ЗША падкрэсліў, што ў выніку распачатых Расіяй баявых дзеянняў каля 10 мільёнаў жыхароў Украіны пакінулі свае дамы, больш за 3 мільёны з іх з'ехалі з краіны, стаўшы бежанцамі галоўным чынам у краінах ЕС. Ён паабяцаў павялічыць гуманітарную падтрымку бежанцаў. Па словах прэзідэнта ЗША, ён быў бы рады наведаць украінскую тэрыторыю, але яму гэтага «не далі» зрабіць, па ўсёй верагоднасці, з меркаванняў бяспекі.
У Польшчу Байдэн прыбыў з Бруселя, дзе прыняў удзел у самітах NATO і «групы сямі» (G7). Ён таксама правёў перагаворы з кіраўніцтвам ЕС. Прэзідэнт ЗША і старшыня Еўракамісіі Урсула фон дэр Ляен у прыватнасці аб’явілі аб плане стварэння рабочай групы, якая зоймецца зніжэннем залежнасці Еўропы ад расійскіх энергарэсурсаў.
Байдэн і іншыя прадстаўнікі адміністрацыі ЗША неаднаразова заяўлялі, што не адправяць амерыканскіх вайскоўцаў ва Украіну, аднак гатовы адказаць рашуча ў выпадку, калі Расія атакуе краіны NATO, такія як Польшча.