Беларусаў у эміграцыі запрашаюць у вандроўкі

Заўтра, 18 снежня, адбудзецца першая экскурсія праекта «Тр-тр-трэвэл», які распавядае з'ехаўшым з радзімы беларусам пра мясціны, у якіх яны апынуліся.

Беларускія прафесійныя гіды вандруюць самі, адштурхоўваючыся ад сваіх новых лакацый, распавядаюць пра свае маршруты, уражанні і лайфхакі ў каналах «Тр-тр-трэвэл» (фэйсбук , тэлеграм @tr_tr_travel, інстаграм) і запрашаюць у сумесныя вандроўкі.
Мэта праекту — выцягнуць беларусаў з эмігранцкай журбы, дапамагчы ўбачыць складаную сітуацыю як цудоўную магчымасць, пазнаёміцца з новай культурай, але і захаваць сваю ідэнтычнасць — бо ўсё робіцца па-беларуску і з адсылкай да беларускай гісторыі і культуры. Калі сцісла, праект мае на мэце ператварыць беларускіх эмігрантаў ва Ў-мігрантаў.

Першая вандроўка адбудзецца па адным з гістарычных раёнаў Варшавы, пазней плануюцца экскурсіі і па іншых гарадах, дзе ўтварыліся вялікія беларускія дыяспары. Арганізатары запрашаюць усіх зацікаўленых!