Экс-рэдактарка расійскага «Першага канала» Марына Аўсяннікава з'ехала ва Украіну

Былая журналістка расійскага «Першага канала» Марына Аўсяннікава пераехала ў Адэсу — горад, дзе яна нарадзілася. Уражанні ад убачанага яна апісала на сваёй старонцы ў Facebook.

«Родная Адэса сустрэла мяне пустымі гатэлямі і замініраванымі пляжамі. Купацца забаронена. Расійскія вайсковыя караблі пастаянна абстрэльваюць горад з мора. Ніхто не можа спрагназаваць, куды прыляціць чарговы снарад», — распавяла Аўсяннікава.

Яна ўспамінае аб трапленні снарада ў шматпавярховы дом, дзе загінулі восем чалавек, у тым ліку немаўля. Па словах Аўсяннікавай, «будаўнікі ўжо пачалі аднаўляць разбураныя секцыі дома». Яна таксама распавядае, што ў памяць аб ваенных злачынствах у Бучы, Ірпені і Марыупалі адэсіты размалявалі плот расійскага консульства чорнай фарбай.

«Мільённы горад апусцеў. Амаль палова яго жыхароў з'ехалі. Астатнія жывуць у пастаянным страху», — піша журналістка.

Супрацоўніца расійскага «Першага канала» Марына Аўсяннікава 14 сакавіка выйшла з антываенным плакатам у жывым эфіры праграмы навін. Яе судзілі і аштрафавалі за «арганізацыю несанкцыянаванага публічнага мерапрыемства» на 30 тысяч расійскіх рублёў (блізу $260).

Паводле «Еўрарадыё».