Кіроўца на слізкай дарозе не змог затармазіць і праляцеў мяжу
Аўтамабіль спыніўся толькі праз 50 метраў, але ўжо на тэрыторыі чужой дзяржавы.
Зімовае патруляванне мяжы, Памежная служба Польшчы
Супрацоўнікі Памежнай службы Польшчы затрымалі грамадзян, якія нелегальна перасеклі польска-расейскую мяжу й на 50 метраў уехалі на тэрыторыю Расеі. Абодва грамадзяне Польшчы — мужчына й жанчына — аштрафаваныя, паведамляе Польскае радыё.
Здарэнне мела месца ноччу з суботы на нядзелю. Супрацоўнікі памежнай службы з заставы ў горадзе Вэнгажэва (Węgorzewo) неслі службу на мяжы з Калінінградскай вобласцю Расеі. У пэўны момант яны заўважылі аўтамабіль Opel Frontera, які рухаўся ў бок граніцы. Памежнікі далі сігнал для таго, каб аўто спынілася. Аднак пры спробе тармажэння Opel пачало заносіць на слізкай дарозе. Аўтамабіль па інэрцыі прасунуўся наперад і затрымаўся праз 50 метраў, але ўжо на тэрыторыі Расеі.
Пасажыры аўто, 31-гадовы мужчына й 28-гадовая жанчына, адразу ж вярнуліся назад у Польшчу. Кіроўца й пасажырка паведамілі, што яны немясцовыя й што заблудзіліся, і прадаставілі на гэта адпаведныя дакументы. Памежнікі адпусцілі «нелегалаў», аднак перад гэтым аштрафаваўшы на 500 злотых (115 эўра) кожнага з іх за нелегальнае перасячэнне мяжы.